Հայաստանի եւ Կանադայի միջեւ ՏՀՏ ոլորտում համագործակցության մեծ հեռանկարներ եմ տեսնում: Այս մասին, այսօր՝ հոկտեմբերի 16-ին, ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի հետ հանդիպման ժամանակ նշել է Հայաստանում Կանադայի արտակարգ եւ լիազոր դեսպան Ջոն Ռոնալդ Քյուրին եւ Հայաստանում Կանադայի դեսպանության նախարար-խորհրդական Անիկ Գուլեը:
Նախարարությունից NEWS.am-ին հայտնում են, որ դեսպանը շնորհակալություն հայտնեց նախարարին հայ-կանադական ՏՀՏ համաժողովի անցկացմանն աջակցելու, այդ ոլորտում համագործակցության հաստատմանն ուղղված ջանքերի համար։ Նա նշեց, որ երկու երկրների միջեւ ՏՀՏ ոլորտում համագործակցության մեծ հեռանկարներ է տեսնում եւ ուրախ կլինի գործակցական հարաբերությունները զարգացնելու նաեւ ճանապարհաշինության, տրանսպորտի, երկաթուղային կառուցվածքների, ինժեներական տեխնոլոգիաների ոլորտներում։
Նախարար Վահան Մարտիրոսյանը, ներկայացնելով համագործակցության հնարավոր ուղղությունները, անդրադարձավ միասնական երթուղային ցանց ստեղծելու եւ Հյուսիս-հարավ ճանապարհային միջանցքի ներդրումային ծրագրերում կանադական ընկերությունների մասնակցության հնարավորությանը։ Նա նշեց, որ եթե կանադական ընկերություններին հետաքրքրի, առաջիկայում կարող են քննարկումներ կազմակերպել եւ առավել հանգամանալի ներկայացնել ծրագրերի մանրամասները։
Հանդիպման ընթացքում քննարկվեցին նաեւ Հայաստանում ՏՀՏ ոլորտի մի շարք ծրագրեր կիրառելու, համատեղ ծրագրերում այդ ոլորտի հայ մասնագետների կարողությունները ներգրավելու հնարավորությունները, Հայաստանի եւ Կանադայի միջեւ տրանսպորտային փոխադրումներին առնչվող մի շարք հարցեր։
