Ամերիկայի Միացյալ Նահանգների Վաշինգտոն քաղաքում հոկտեմբերի 12-ից հոկտեմբեր 15-ը տեղի է ունեցել Արժույթի միջազգային հիմնադրամի (ԱՄՀ) եւ Համաշխարհային բանկի խմբի տարեկան ժողովը, որին մասնակցել են Հայաստանի Հանրապետության փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը, ֆինանսների նախարար Վարդան Արամյանը եւ Կենտրոնական բանկի նախագահ Արթուր Ջավադյանը:
Կառավարությունից NEWS.am-ին հայտնում են, որ Համաշխարհային բանկի եւ Արժույթի միջազգային հիմնադրամի տարեկան ժողովի շրջանակներում տեղի են ունեցել տնտեսական կարեւորություն ներկայացնող մի շարք հանդիպումներ, մասնավորապես՝ Համաշխարհային բանկի Եվրոպայի եւ Կենտրոնական Ասիայի հարցերով նախագահի տեղակալ պարոն Սիրիլ Մյուլլերի եւ տարածաշրջանի տնօրեն Ֆրանկ Հիմսկերկի, ԱՄՀ գործադիր տնօրեն Էնթնի դը Լանոյի, ԱՄՀ տարածաշրջանի հարցերով տնօրեն Ջիհադ Ազուրի հետ եւ այլն: Քննարկումների հիմնական շրջանակը ներառել է համաշխարհային տնտեսության, տնտեսական իրավիճակի զարգացման ընթացիկ միտումների, համաշխարհային ֆինանսական շուկաներում ֆինանսական կայունության, տարածաշրջանում տնտեսական իրավիճակի եւ զարգացող երկրներում աղքատության մակարդակի կրճատմանը վերաբերող հարցեր:
Հոկտեմբերի 13-ին Վաչե Գաբրիելյանը հանդիպում է ունեցել ԱՄՆ պետդեպարտամենտի Եվրոպայի ու Եվրասիայի հարցերով պետքարտուղարի տեղակալ տիկին Բրիջիթ Բրինքի հետ:
Հոկտեմբերի 16-ին ՀՀ փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը աշխատանքային այցով կմեկնի Կալիֆոռնիա, որտեղ հանդիպում կունենա նահանգապետ Ջերի Բրաունի հետ: Հանդիպման ընթացքում կքննարկվեն երկկողմ առեւտրատնտեսական հարաբերությունների խորացմանն ուղղված մի շարք հարցեր:
