Փաստաբանների Պալատի խորհուրդը հոկտեմբերի 18-ին որոշել է փաստաբաններ Տիգրան Աթանեսյանին, Արմեն Սողոմոնյանին եւ Արթուր Գրիգորյանին ենթարկել կարգապահական տույժի. նրանք տուգանվել են 100 հազար դրամով եւ մասնակցելու են մի քանի ժամ դեոնթոլոգիական դասընթացների (Աթանեսյանի բնորոշմամբ՝ ստոմատոլոգիական):
NEWS.am-ի հետ զրույցում Տիգրան Աթանեսյանը նշեց, որ մի քանի ամիս առաջ դիմում է ներկայացրել Փաստաբանների Պալատի ընդհանուր ժողովին՝ վիճարկելով իր նկատմամբ մեկ այլ կարգապահական վարույթ հարուցելու որոշումը:
Փաստաբանի խոսքով, ոմն Գեւորգ Գեւորգյանի ստորագրությամբ պատասխան է ստացել վիրավորական արտահայտություններով եւ այն հրապարակել է ֆեյսբուքյան իր էջում, որն էլ բազմաթիվ օգտատերեր են մեկնաբանել:
«Քանի որ այդ պատասխանի իրական հեղինակը Արա Զոհրաբյանն էր, երեւի նեղվել էր դրանից եւ խորհրդին հանձնարարել, որ իմ նկատմամբ կարգապահական վարույթ հարուցեն, ինձ հետ միասին նաեւ Արթուր Սողոմոնյանին եւ Արթուր Գրիգորյանին, նույն թեմայով կա նաեւ կարգապահական վարույթ Վահե Գրիգորյանի նկատմամբ: Այդ հրապարակումս շատերն էին մեկնաբանել»,-ասաց նա:
Տիգրան Աթանեսյանը նշեց, որ ՓՊ խորհրդի այսօրվա որոշմանը լուրջ չի վերաբերվում, այս պահին ավելի կարեւոր է փաստաբանի մասնագիտության փրկությունը. «Այսօրվա կայացված որոշմանը ես լուրջ չեմ վերաբերվում, ամբողջ հիմնարկին էլ լուրջ չեմ վերաբերվում, ամեն ինչ այնքան ակնհայտ է դարձել, որ ժամանակն է այս հարցին տալ նորմալ լուծում: Ես չեմ վախենում այդ կարգապահականներից, իմ ծիծաղն է գալիս իրենց վրա, քանի կարողանում են, թող անեն: Իմ նպատակը ոչ թե պաշտոն ունենալն է, այլ մասնագիտության փրկությունն է նմանատիպ կերպարների ձեռքից»: