Երեւանի ավագանու «Ելք» խմբակցության ղեկավար Դավիթ Խաժակյանը գրությամբ դիմել է քաղաքապետ Տարոն Մարգարյանին՝ պարզելու, թե ինչու է Երեւանի քաղաքապետարանը իր բյուջեից տարեկան 11 մլն դրամ անդամավճար տալիս մի ասոցիացիայի, www.avagani.am, որը փաստացի չի գործում եւ որի նախագահն է ՀՀ ԱԺ պատգամավոր, ՀՀԿ խմբակցության անդամ Արայիկ Հովհաննիսյանը:
Ստորեւ ներկայացնում ենք դիմումի տեքստը.
«Հարգելի՛ պարոն Մարգարյան,
Երեւան համայնքի ավագանին հանդիսանալով Հայաստանի ավագանիների ասոցիացիայի անդամ այդ կազմակերպությանը վճարում է տարեկան 11 մլն ՀՀ դրամ, մինչդեռ 2015թ. դրությամբ վճարվող անդամավճարը կազմում էր տարեկան 5.5 մլն դրամ: Ասոցիացիայի պաշտոնական կայքի ուսումնասիրությունները ցույց են տալիս, որ տեւական ժամանակ է այդ կազմակերպությունը փաստացի չի գործում, ուստի առաջանում է անդամակցության վերանայման խնդիրը:
Հիմք ընդունելով Երեւան քաղաքում տեղական ինքնակառավարման մասին ՀՕ-5-Ն օրենքի 37-րդ հոդվածի 2-րդ մասը, խնդրում եմ տրամադրել տեղեկատվություն հետեւյալի վերաբերյալ.
որքա՞ն ժամանակ է Երեւան քաղաքի ավագանին անդամակցում Հայաստանի ավագանիների ասոցիացիային եւ որքա՞ն է կազմել տարեկան անդամավճարը ըստ անդամակցության տարիների,
խնդրում եմ տրամադրել տեղկատվություն (ժամանակացույց) Հայաստանի ավագանիների ասոցիացիայի կողմից կազմակերպված աշխատանքներին Երեւան քաղաքի ավագանու մասնակցության վերավերյալ,
ի՞նչն է հիմք հանդիսացել Հայաստանի ավագանիների ասոցիացիային անդամակցության տարեկան վճարի կրկնապատկման համար,
Տեղեկացնում եմ նաեւ, որ համաձայն ասոցիացիայի պաշտոնական կայքէջում տեղադրված կանոնադրության 4.1 ենթակետի, կազմակերպության անդամ կարող է դառնալ ՀՀ ցանկացած քաղաքացի: Անդամակցության վերաբերյալ կանոնադրությամբ այլ բան սահմանված չէ, ինչը նշանակում է, որ սույն կազմակերպության անդամակցությունը կրում է բացառապես անհատական բնույթ եւ որպես հավաքական մարմին Երեւան քաղաքի ավագանին չի կարող հանդիսանալ այս կազմակերպության անդամ:
Հիմք ընդունելով վերոգրյալը դիմում եմ Ձեզ առաջարկով՝ կասեցնելու Երեւան քաղաքի ավագանու անդամակցությունը Հայաստանի ավագանիների ասոցիացիային եւ քննարկելու անդամակցության դադարեցման հարցը: