Նախագահ Սերժ Սարգսյանը չէր հայտարարել, որ Հայաստանի բնակչության թիվը մինչեւ 2040 թվականը կհասնի 4 միլիոնի, այլ նշել էր, որ պետք է անել ամեն ինչ, որպեսզի այն հասնի 4 միլիոնի։ Այս մասին հոկտեմբերի 19–ին՝ լրագրողների հետ հանդիպման ժամանակ, ասել է քաղտեխնոլոգ Կարեն Քոչարյանը ։ Ըստ նրա՝ ցանկացած երկրի նախագահ ցանկանում է, որ իր հանրապետությունում լուծվի ժողովրդագրության հարցը։
«Այսպիսով, ՌԴ–ն որոշել է լուծել ժողովրդագրության խնդիրը։ Հսկայական Ռուսաստանում ապրում է ընդամենը 130–135 միլիոն մարդ։ Նրանց մոտ առկա են ծնելիության հետ կապված խնդիրներ»,–պարզաբանել է Քոչարյանը։
Մասնագետը նշել է, որ այս խնդրի լուծումը կերաշխավորի հանրապետության անվտանգության ապահովումը։ Հիշեցնենք, որ համաձայն ՄԱԿ զեկույցի՝ այս պահին Հայաստանում ապրում է 2,93 միլիոն մարդ։
Մինչդեռ մինչեւ 2050 թվականը Հայաստանի բնակչության թիվը կնվազի մինչեւ 2,7 միլիոնի, իսկ 2100 թվականին այն կկազմի ընդամենը 1,8 միլիոն։
Հայաստանի նախագահ Սերժ Սարգսյանը Հայաստանի վեցերորդ գումարման Ազգային ժողովի 1-ին նիստի ժամանակ հայտարարել էր, որ մինչեւ 2040թ. Հայաստանի բնակչության թիվը պետք է կազմի 4 միլիոն։