Գարեգին Բ Ամենայն Հայոց Կաթողիկոսը հոկտեմբերի 19-ին, Եվրոպայում Ռեֆորմացիայի 500-ամյա հոբելյանի հիշատակության միջոցառումների շրջանակներում, պաշտոնական ընդունելությամբ հանդիպել է Գերմանիայի Դաշնային Հանրապետության նախկին նախագահ Յոհակիմ Գաուկի հետ:
Մայր Աթոռ Սուրբ Էջմիածնի Տեղեկատվական համակարգից NEWS.am-ին հայտնում են, որ Նորին Սրբությանն ուղեկցում էին Գերմանիայի հայոց թեմի առաջնորդ, Կոստանդնուպոլսի Հայոց պատրիարքության պատրիարքական տեղապահ Գերաշնորհ Տ. Գարեգին արքեպիսկոպոս Բեքչյանը, Դամասկոսի հայոց թեմի առաջնորդ Գերաշնորհ Տ. Արմաշ եպիսկոպոս Նալբանդյանը եւ Գերմանիայի հայոց թեմի առաջնորդական փոխանորդ Հոգեշնորհ Տ. Սերովբե վարդապետ Իսախանյանը:
Վեհափառ Հայրապետն իր ուրախությունը հայտնեց Գերմանիայի Բունդեսթագում Հայոց ցեղասպանության ճանաչման եւ դատապարտման գործում իր կարեւոր ներդրումը բերած Գերմանիայի նախկին նախագահի հետ հանդիպման առիթով:
Նորին Սրբությունը տիար Գաուկին նաեւ ներկայացրեց անկախությունից հետո ժողովրդի հոգեւոր վերազարթոնքի ու Հայաստանյայց Առաքելական Սուրբ Եկեղեցու ձեռքբերումների համառոտ պատկերը, ինչպես նաեւ Հայոց Եկեղեցու ծավալած գործունեությունը միջեկեղեցական ու միջկրոնական ոլորտում:
Զրույցի ընթացքում ընդգծվեց քրիստոնեական արժեքների հոգեւոր ու մշակութային կարեւորությունը եւ դրանց հանդեպ հավատարմությունը հասարակությունների կյանքից ներս»։