Հայաստանն ու Ղրղզստանը կստեղծեն տնտեսական համագործակցության ճանապարհային քարտեզ: Այս մասին նշվել է այսօր՝ հոկտեմբերի 25-ին, Երեւանում, ՀՀ տնտեսական զարգացման եւ ներդրումների նախարար Սուրեն Կարայանի եւ Ղրղզստանի Հանրապետության էկոնոմիկայի նախարար Արտյոմ Նովիկովի հանդիպման ժամանակ:
Նախարար Կարայանը նշել է, որ մեծածավալ աշխատանք կա իրականացնելու՝ հայ-ղրղզական տնտեսական համագործակցությունն ընդլայնելու համար, քանի որ ներկայիս առեւտրաշրջանառության տեմպերը եւ ծավալները գոհացուցիչ չեն երկու կողմերի համար:
Ղրղզստանի էկոնոմիկայի նախարար Արտյոմ Նովիկովը շնորհակալություն է հայտնել հայ գործընկերոջը հանդիպման համար եւ նշել, որ երկու երկրների տնտեսություններն ունեն մի շարք ընդհանրություններ, եւ այս համատեքստում համագործակցության լուրջ ներուժ կա:
Կողմերը պայմանավորվածություն են ձեռք բերել ստեղծելու տնտեսական համագործակցության ճանապարհային քարտեզ: Հայկական կողմը պատրաստակամություն է հայտնել նաեւ աջակցել Ղրղզստանին ԵՄ GSP+ համակարգին միանալու հարցում` կիսվելով փորձով:
Կողմերը պատրաստակամություն են հայտնել նաեւ աջակցելու միմյանց եւ խորացնելու փոխգործակցությունը ինտեգրացիոն միավորներում, մասնավորապես՝ ԵՏՄ շրջանակներում:
