Հայ-վրացական հարաբերություններում վերջին շրջանում սրվել են եկեղեցական խնդիրները: Այս մասին այսօր` դեկտեմբերի 15-ին, լրագրողների հետ հանդիպման ժամանակ ասաց Ազգային Ժողովի պատգամավոր, «Ջավախք» հայրենակցական միության նախագահ Շիրակ Թորոսյանը: Նրա խոսքով, Հայ առաքելական եկեղեցին այդպես էլ Վրաստանում իրավական կարգավիճակ չստացավ, թեեւ բազմիցս վրացական տարբեր մակարդակի պաշտոնյաներ նման հավաստիացնումներ էին տալիս:
«Հայ առաքելական եկեղեցու Վրաստանի թեմին հետ չվերադարձվեցին հայկական եկեղեցիները եւ նույնիսկ չստացվեց Ամենայն հայոց կաթողիկոս Գարեգին Բ-ի այցելությունը Վրաստան»,-ասաց պատգամավորը` հավելելով, որ գարնանից նախատեսվում էր Վեհափառի հովվապետական եւ միջեկեղեցական այցելությունը Վրաստան, սակայն անընդհատ հետաձգվում է վրացական հոգեւոր առաջնորդի` Իրակլի Երկրորդի խնդրանքով:
«Այցելության հետաձգումը պատճառաբանվեց նրա առողջական խնդիրներով, արտասահմանում բուժվելու հիմնավորմամբ եւ այդպես գարնանը նախատեսված հանդիպումը հետաձգվեց մինեչեւ աշուն, աշնանը նախատեսված հանդիպումը հետաձգվել է հաջորդ գարուն, մինչդեռ այդ ընթացքում մենք տեսնում ենք, որ Վրաստանի Կաթողիկոսը բավականին առույգ կերպով Վրաստանի տարբեր մարզեր այցելություններ է կատարում: Ըստ երեւույթին առողջական խնդիրները նրան չեն խանգարում աշխատել եւ այցելություններ կատարել: Վրաստանի հոգեւոր իշխանություններին, իրենց իսկ կարծիքով, սպասվում են տհաճ զրույցներ եւ նրանք փորձում են այս ճանապարհով խուսափել դրանից»,-նշեց Թորոսյանը:
Նա հիշեցրեց, որ Վրաստանի Վերաինտեգրացման փոխնախարար Ելենա Թեոդորաձեն հայտարարելով, թե իրենք Էջմիածնի եկեղեցուն Վրաստանում կարգավիճակ չենք տա, արտահայտել է նաեւ Վրաստանի քաղաքական վերնախավի վերաբերմունքը այս խնդրի վերաբերյալ:
