Ես որպես քաղաքացի չէի ցանկանա ԳՄՕ պարունակող ապրանք օգտագործել: Այս մասին, այսօր՝ նոյեմբերի 9-ին, կառավարության նիստից հետո լրագրողների հետ զրույցում նշել է Սննդամթերքի անվտագության պետական ծառայության պետ Իշխան Կարապետյանը:
Նրա խոսքով, գենետիկորեն ձեւափոխված օրգանիզմների մասով գիտության մեջ դեռ կան տարրբեր քննարկումներ. «Մեր ծառայությունը գործողություններ է իրականացնում իր լիազորությունների շրջանակներում եւ ուսումնասիրում է շրջանառության գործընթացը: Ներկայումս, «Մոնսանտո» ընկերության կողմից ներկրված սերմերի ծավալը չի գերազանցում 1 տոկոսը ընդհանուր ներկրման մեջ: Չեմ կարծում, որ դա մեծ ռիսկ է պարունակում»,-ասաց նա:
Իշխան Կարապետյանը տեղեկացրեց, որ 2018-ին ՍԱՊԾ-ն նախատեսել է լայնածավալ մոնիտորինգային ծրագրեր իրականացնել՝ բուսական ծագման մթերքներում պեստիցիդների, նիտրատների եւ ԳՄՕ-ների մասով. «Այդ արդյունքներն ամփոփելուց հետո կունենանք ամբողջական պատկեր վերահսկողության մասով գնահատականներ տալու»:
Հարցին, թե որքանով է նպատակահարմար թույլ տալ, որ ԳՄՕ պարունակող սննդամթերքը մտնի Հայաստան, ՍԱՊԾ պետ-ը պատասխանեց, որ իրենք գործում են իրենց լիազորությունների շրջանակում. «Իմ իրավասություններից դուրս է՝ նման սննդամթերքը կգա Հայաստան, թե ոչ: Ես ինքս որպես մարդ, որպես քաղաքացի, բնականաբար չեմ կարծում, որ ԳՄՕ պարունակող մթերքը նպատակահարմար է իրացնել Հայաստանում, բայց գիտության մեջ կան քննարկումներ որոնք դեռ շարունակվում են՝ կապված ԳՄՕ մթերքների վնասական ազդեցության եւ գյուղատնտեսության տեսանկյունից դրանց արդյունավետության հետ: Այդ վեճը դեռ գնում է, բայց ես որպես քաղաքացի չէի ցանկանա նման ապրանք օգտագործել»:
Իշխան Կարապետյանը նշեց նաեւ, որ Հայաստանում սննդամթերքի անվտանգության մասին օրենսդրությամբ սահմանված է պահանջ՝ սննդամթերքի մասով, եթե ԳՄՕ-ի պարունակության մասին պետք է անպայման մակնշում կատարվի. «Ինչ վերաբերում է Մաքսային միության կանոնակարգերին, ապա կրկին նախատեսված է սննդամթերքում ԳՄՕ-ի համար համապատասխան մակնշում: Սահմանված է, որ սննդամթերքի բաղադրության մեջ թույլատրելի շեքում՝ 0,9 տոկոս»:
Հիշեցնենք, որ օրերս Հայաստանում ԱՄՆ դեսպանատան գործերի ժամանակավոր հավատարմատար Ռաֆիկ Մանսուրը նշել է, որ Հայաստանի շուկա է մտնում «Monsanto» ընկերությունը, որը զբաղվում է ԳՄՕ սերմերի արտադրությամբ: Արդեն իսկ մտահոգություններ են հնչում, որ դա կարող է վտանգավոր լինել Հայաստանի բնակչության համար: Հայտնի երաժիշտ Սերժ Թանկյանը եւս կոչ է արել մարդկանց հեռու մնալ «Monsanto»-ի արտադրանքից:
ԱՄՆ դեսպանատունն այս խնդրի առնչությամբ NEWS.am-ի հարցմանն ի պատասխան հայտարարել է, որ «Մոնսանտո» ընկերության արտադրանքից եւ ծառայություններից օգտվել չօգտվելու որոշումը կայացվելու է ֆերմերների եւ ագրոբիզնեսների կողմից:
