Մենք հիմա ուսումնասիրում ենք, թե ինչ է արել «Monsanto» ընկերությունը մինչ այսօր, որովհետեւ այդ ընկերությունը շատ վաղուցվանից, 20 տարի է գրանցված է Հայաստանում եւ գործունեությունը է ծավալում: Այս մասին, այսօր՝ նոյեմբերի 9-ին, կառավարության նիստից հետո լրագրողների հետ զրույցում նշել է ՀՀ գյուղատնտեսության նախարար Իգնատի Առաքելյանը՝ անդրադառնալով ԳՄՕ սերմեր ներմուծող Monsanto ընկերության գործունեությանը Հայաստանում:
Դիտարկմանը, որ հնարավոր է, այդ ընկերությունը ԳՄՕ սերմեր է ներկրում Հայաստան, նախարարը չբացառեց՝ նշելով. «Հնարավոր է: Հիմա ուսումնասիրում ենք դաշտ, որ հասկանանք, թե ինչ ռիսկեր կան նրանց արած աշխատանքներում: Հասկանանք, թե ինչ ռիսկեր կան ոչ միայն գյուղատնտեսության ոլորտում, այլեւ ընդհանրապես, նաեւ բնապահպանության նախարարության հետ համատեղ: Հիմա չեմ կարող ասել, որ քայլեր ենք ձեռնարկել կամ ձեռնարկելու ենք: Ուսումնասիրությունից հետո մի քանի օրվա ընթացքում կասենք: Մենք չենք համագործակցում այդ ընկերության հետ, իրենք իրենց համար գործունեությունը են ծավալում: Մենք կուսումնասիրենք, թե ինչ են իրենք անում, որքանով են այդ ԳՄՕ սերմերը տարածված, ինչ են իրենք ներմուծում»:
Նախարարը տեղեկացրեց, որ ԳՄՕ սննդամթերքների հետ կապված օրենսդրական նախաձեռնություն 2013-ին եղել է, սակայն իրեն անհայտ պատճառներով շարունակություն չի ունեցել:
հարցին, թե վտանգ տեսնում եք ԳՄՕ արտադրանքի հետ կապված, նախարարը դրական պատասխան տվեց. «Միշտ վտանգը կա: Օրգանիկը մնում է օրգանիկ: Այստեղ պետք է հասկանալ, թե այն ինչ այսօր հայտարարվում է, որքանով է համապատասխանում իրականությանը եւ ինչքան ռիսկեր ունենք: Հիմա չունենք օրենք: Մինչեւ հիմա չենք ուսումնասիրել խնդիրը»:
Հիշեցնենք, որ օրերս Հայաստանում ԱՄՆ դեսպանատան գործերի ժամանակավոր հավատարմատար Ռաֆիկ Մանսուրը նշել է, որ Հայաստանի շուկա է մտնում «Monsanto» ընկերությունը, որը զբաղվում է ԳՄՕ սերմերի արտադրությամբ: Արդեն իսկ մտահոգություններ են հնչում, որ դա կարող է վտանգավոր լինել Հայաստանի բնակչության համար: Հայտնի երաժիշտ Սերժ Թանկյանը եւս կոչ է արել մարդկանց հեռու մնալ «Monsanto»-ի արտադրանքից:
ԱՄՆ դեսպանատունն այս խնդրի առնչությամբ NEWS.am-ի հարցմանն ի պատասխան հայտարարել է, որ «Մոնսանտո» ընկերության արտադրանքից եւ ծառայություններից օգտվել չօգտվելու որոշումը կայացվելու է ֆերմերների եւ ագրոբիզնեսների կողմից:
