Թափանցիկության ապահովման եւ հանուն հնարավոր ռիսկերից խուսափելու լուրջ փոփոխություններ են նախատեսված շտապ զորակոչի ենթակա անձանց բուժզննման եւ հետազոտության անցկացման համակարգում, ինչպես նաեւ զինծառայողների առողջական վիճակը գնահատելիս: Նոյեմբերի 14-ին ԱԺ-ում այս մասին ասաց պաշտպանության փոխնախարար Արտակ Զաքարյանը՝ երկրորդ ընթերցմամբ խոհրդարանի քննարկմանը ներկայացնելով «Զինվորական ծառայության եւ զինծառայողի կարգավիճակի մասին» օրինագիծը, որում միավորված են գործող «Զինծառայությունը կրելու մասին», «Զինապարտության մասին», «Զինծառայողների եւ նրանց ընտանիքների անդամների սոցիալական ապահովութւյան մասին» օրենքները:
Փոխնախարարի պարզաբանմամբ՝ կատարված լրացումներով նախատեսվում է,որ այսուհետեւ բուժզննումների եւ հետազոտությունների ընթացակարգերը, ինչպես նաեւ զինվորական ծառայություն կրելուն հակացուցված հիվանդությունների ցանկը կորոշվեն կառավարության որոշմամբ՝ ներկայումս գործող կարգի փոխարեն, երբ հաստատում է պաշտպանության նախարարը: