Ազգային ժողովի ՀՀԿ խմբակցության պատգամավոր Կորյուն Նահապետյանն այսօր՝ նոյեմբերի 15-ին, ֆինանսների նախարար Վարդան Արամյանին «մեղադրեց» տարբեր ոլորտներին վերաբերող ծախսային քաղաքականությանը ծանոթ չլինելու մեջ:
2018թ. բյուջեի նախագծի քննարկման ժամանակ Կորյուն Նահապետյանը ֆինանսների նախարարից հետաքրքրվեց, թե արտաքին իրավիճակների եւ աղետների նվազեցման բնագավառում 2018թ.-ի բյուջետային քաղաքականության հիմնական բովանդակությունը որն է:
«Կարծում եմ՝ այդ հարցը պետք է ուղղեք արտակարգ իրավիճակների նախարարին, որովհետեւ դա խորը, մասնագիտական եւ ոլորտային հարց է»,- արձագանքեց Վարդան Արամյանը:
Այս պատասխանը կարծես հունից հանեց ՀՀԿ-ական պատգամավորին. «Դուք՝ որպես հիմնական զեկուցող, պետք է պատասխանեք բոլոր ոլորտների ծախսային քաղաքականությանը վերաբերող հարցերին, որովհետեւ այդպիսի հնարավորություն այլեւս չենք ունենա: Ձեր զեկույցում սլայդների վրա պատկերված էր Ֆինանսների նախարարության շենքը, մինչդեռ պետք է լիներ Կառավարությունը պատկերված: Պետք է ընդունեք այն փաստը, որ Դուք հանդես եք գալիս ամբողջ Կառավարության անունից եւ այստեղ ներկայացնում եք Կառավարությունը»:
Վարդան Արամյանը հիշեցրեց, որ հանձնաժողովներում մանրամասն քննարկվել են տարբեր նախարարությունների ծախսային քաղաքականությունները, այդ թվում արտակարգ իրավիճակների նախարարության. «Ծախսային քաղաքականությանը ես ծանոթ եմ, բայց ծրագրայինը նախարարությանը պետք է հարցնել»:
