Գյուղատնտեսության ոլորտին պետական բյուջեից տրամադրվող հատկացումների ծավալը աճել է 58 տոկոսով: Այս մասին այսօր՝ նոյեմբերի 16-ին, Հայաստանի 2018թ. բյուջեի նախագծի քննարկմանն ասաց ՀՀ գյուղատնտեսության նախարար Իգնատի Առաքելյանը:
«Հայաստանի գյուղատնտեսության ոլորտում գյուղտեխնիկայի թարմացումը կբարձրացնի արդյունավետությունը, ջրային սակավ ռեսուրսների առավել արդյունավետ օգտագործումը, ինտենսիվ գյուղատնտեսության խրախուսումը, ապահովագրական համակարգի ներդնումը, արտադրող, արտահանող շղթայի մշակումը, օրենսդրական դաշտի կարգավորումը կապահով այս ոլորտում արդյունավետությունը: Հենց այս թիրախներից ելնելով էլ մեր ծրագրերը մշակվել են»,-ասաց նա:
Նախարարը նշեց, որ շարունակվելու է գյուղատնտեսական տեխնիկայի կայանի հիմնումը փոքր եւ միջին ձեռնարկություններին բարձրակարգ եւ մատչելի ծառայություն մատուցելու նպատակով, կաթիլային ոռոգման համակարգի ներդրման համար 2 տոկոսով վարկեր են տրամադրվելու, ՀՀ Արտակարգ իրավիճակների նախարարության կողմից հակակարկտային, հրթիռային համակարգի ներդնումն է լինելու, որը թույլ կտա համակարգված կերպով պայքարել կարկտահարության դեմ: Փոքր ու միջին գյուղացիական տնտեսությունների զարգացման նպատակով տրամադրվելու են 3-10 միլիոն դրամի հասնող վարկեր՝ 5 տոկոսով:
Նշենք, որ Ազգային ժողովում այսօր շարունակում է վեցերորդ գումարման երկրորդ նստաշրջանը. օրակարգում 2018 թվականի պետական բյուջեի նախագիծն է:
2018 թվականի բյուջեի քննարկումները մեկնարկել են նախօրեին: