Հայաստանի Ազգային ժողովն այսօր՝ նոյեմբերի 17-ին, շարունակում է իր աշխատանքը: Քննարկվում է «ՀՀ քրեական օրենսգրքում լրացում կատարելու մասին» նախագիծը առաջին ընթերցմամբ ընդունելու հարցը, որը վերաբերում է բժիշկների նկատմամբ բռնություն գործադրած անձանց պատժի խստացմանը:
Օրենքի նախագծով սահմանվում է բուժաշխատողի մասնագիտական գործունեությանը խոչընդոտելը, որը կատարվել է նրա նկատմամբ կյանքի կամ առողջության համար ոչ վտանգավոր բռնություն գործադրելով կամ բռնություն գործադրելու սպառնալիքով, պատժվում է տուգանքով՝ նվազագույն աշխատավարձի երեք հարյուրապատիկից հինգ հարյուրապատիկի չափով:
Հիշեցնենք, որ նախօերին քննարկվել է ՀՀ 2018 թվականի բյուջեի նախագիծը, սակայն քննարկումը չի ավարտվել:
Բացի այդ, քննարկվել է բանակից խուսափածներին վերաբերող օրինագիծը, որը հնարավորություն է տալիս անձին, որը խուսափել է բանակից եւ լրացել է նրա 27 տարեկանը, վճարի որոշակի գումար եւ ազատվի քրեական պատասխանատվությունից:
ԱԺ-ն երեկ քննարկել է նաեւ «Հայաստանի Հանրապետության եւ Ռուսաստանի Դաշնության միջև միջպետական (միջկառավարական) համաձայնագրերի շրջանակներում Հայաստանի Հանրապետության զինված ուժերի համար բացառապես ռազմական նշանակության արտադրանքի ներմուծումն ավելացված արժեքի հարկից ազատելու մասին» համաձայնագիրը երկրորդ ընթերցմամբ: