Հայաստանի տնտեսվարողների կապիտալ եւ ընթացիկ ծախսերի գնահատման մեթոդին վերաբերող վարչական կարգավորումը կդյուրացվի եւ կկոնկրետացվի: Համապատասխան որոշումն ընդունվեց կառավարության նոյեմբերի 23-ի նիստում:
Որոշման նախագիծը ներկայացնելիս ֆինանսների նախարար Վարդան Արամյանը նշեց, որ ձեռնարկատերերից բավականին մեծ թվով բողոքներ են ստացել, եւ հենց բիզնես հանրույթի առաջարկով է գործող նորմերի վերանայման որոշում ընդունվել: Խոսքը, մասնավորապես, այն մասին է, որ գործող կարգավորման համաձայն՝ այն բոլոր ծախսերը, որոնք հանգեցնում են հիմնական միջոցների վիճակի փոփոխության, կապիտալ ծախսեր են համարվում: «Սակայն խնդիրն այն է, որ հաճախ վիճելի պահեր են առաջանում այն կապակցությամբ, թե մենք ինչ ենք հասկանում հիմնական միջոցների վիճակի փոփոխությունների տակ: Օրինակ՝ եթե տնտեսվարողը վերանորոգում է վարչական շենքի որեւէ մասը, դա նշանակո՞ւմ է, որ նա կապիտալ ծախսեր է կատարել, թե՞ այնուամենայնիվ պետք է համարել ընթացիկ վերանորոգում: Չէ՞ որ այս 2 ուղղություններով հարկային պարտավորությունները տարբեր են»,- պարզաբանեց Արամյանը՝ հավելելով, որ առաջին դեպքում միջոցները կապիտալացվում եւ ամորտիզացվում են, իսկ երկրորդ դեպքում դիտարկվում են որպես անմիջական ծախսեր:
Գործընթացի կոնկրետացման եւ դյուրացման համար առաջարկվում է այսուհետեւ բոլոր այն ծախսերը, որոնք կազմում են հիմնական միջոցների նախնական արժեքի 5 տոկոսից ավելին, դիտարկել որպես կապիտալ: Նախարարի խոսքով՝ սրանով զգալիորեն կդյուրացվի տնտեսավարողների գործունեությունը իրենց ծախսերի տեսակներն առանձնացնելիս եւ հետագա հարկումը: