ԵՄ-ի հետ շրջանակային համաձայնագրի ստորագրումից հետո Հայաստանում չի կարող կրկնվել ուկրաինական սցենարը, քանի որ այս համաձայնագիրը ստորագրելիս Ռուսաստանի շահերը հաշվի են առնվել, ավելին մենք արդեն ԵՏՄ-ում ենք։ Այս մասին այսօր՝ նոյեմբերի 23-ին լրագրողների հետ հանդիպմանը հայտարարեց «Մոդուս Վիվենդի» կենտրոնի ղեկավար, քաղաքագետ Արա Պապյանը։
«Այլ կարեւոր փաստ է պետք է ընդգծել՝ Հայաստանը ցույց է տալիս, որ երկիրը, լինելով ԵՏՄ անդամ, կարող է սերտորեն համագործակցել ԵՄ-ի հետ։ Այսինքն՝ սա կարող է բարձրացնել ոչ միայն Հայաստանի հեղինակությունը, այլ նաեւ գրավիչ կդարձնի ԵՏՄ-ն»,-նշեց նա։
Արա Պապյանի կարծիքով՝ փաստաթուղթը հենք է հարաբերությունների զարգացման համար, սակայն պետք է դրսեւորել քաղաքական կամք։ «Ռուսաստանի ազդեցությունը, իհարկե, մեծ է Հայաստանում, ուստի ԵՄ-ն էլ է շատ շահագրգռված փաստաթղթի ստորագրման մեջ եւ ստորագրման դեպքում ԵՄ-ում սա ներկայացնելու են որպես «հաջողված պատոմություն։ Ավելին, սա հնարավորություն է ԵՄ-ի համար իր դիրքերը Հայաստանում ամրապնդելու»,-նշեց նա։
Հիշեցնենք, որ նոյեմբերի 24-ին Բրյուսելում կկայանա Եվրոպական միության Արեւելյան գործընկերություն ծրագրի 5-րդ գագաթաժողովը, որի ժամանակ նախատեսվում է ստորագրել Հայաստամի եւ ԵՄ-ի միջեւ շրջանակային համաձայնագիրը։
Ավելի վաղ NEWS.am-ը հայտնել էր, որ ՀՀ նախագահ Սերժ Սարգսյանն այսօր՝ նոյեմբերի 23-ին, աշխատանքային այցով կմեկնի Բելգիայի Թագավորություն՝ մասնակցելու Բրյուսելում նոյեմբերի 23-24-ը կայանալիք ԵՄ Արեւելյան գործընկերության գագաթնաժողովին: