Այսօր Հայաստանը կստորագրի ԵՄ-ի հետ համապարփակ եւ ընդլայնված գործընկերության մասին համաձայնագիրը: Այս մասին «Արեւելյան գործընկերության» գագաթնաժողովում իր ելույթում ասել է Եվրոպական խորհրդարանի նախագահ Անտոնիո Տայանին:
Տայանիի խոսքով՝ Եվրախորհրդարանն ամբողջ ուժով ջանում է հասնել համաձայնագրի ստորագրմանը եւ վիզաների ազատականացման գործընթացի ակտիվացմանը:
Տայանին հայտարարել է, որ ԵՄ-ն «կշարունակի ուս ուսի կանգնել» «Արեւելյան գործընկերության» անդամ երկրների հետ՝ նշելով, որ Գագաթնաժողովի ձեռքբերումները կարող են դրվել ապագա համագործակցության ավելի հավակնոտ մոտեցման հիմքում: «Ժամանակն է հաստատելու «Արեւելյան գործընկերության» առավել հստակ հայեցակարգը՝ հիմնված ժողովրդավարական պլյուրալիզմի, մարդու իրավունքների հարգանքի եւ հիմնարար ազատությունների, իրավական պետության եւ արդյունավետ կառավարման, կոռուպցիայի դեմ պայքարի, թափանցիկության մեծացման միջոցառումների եւ քաղաքացիական հասարակության մասնակցության վրա»,- նշել է նա:
Տայանին կարծում է, որ ԵՄ-ն պետք է այս գործընկերությունն օգտագործի անվտանգության ընդհանուր տարածքում վստահության ամրապնդման համար:
Նրա խոսքով՝ «Արեւելյան գործընկերության» տարածաշրջանում հակամարտությունները ազդում են ոչ միայն անկախության, ինքնիշխանության, տարածքային ամբողջականության եւ մարդու իրավունքների պաշտպանության վրա, այլ նաեւ կարող են խափանել ԵՄ կայունությունն ու անվտանգությունը: