Ազգային ժողովը, հաշվի առնելով ԵՏՄ անդամակցությունից հետո բացասական հետեւանքները, պետք է որոշում կայացնի ԵՏՄ–ից դուրս գալու մասին։ Այս մասին նոյեմբերի 27-ին՝ ԱԺ–ում «Եվրասիական տնտեսական միության մասին պայմանագրից Հայաստանի դուրս գալու գործընթացի մեկնարկի մասին» լսումների ժամանակ, ասել է «Ելք» խմբակցության պատգամավոր Էդմոն Մարուքյանը։
Նրա խոսքով՝ ԵՏՄ–ում գտնվելու ժամանակահատվածում Հայաստանում որոշ ուղղություններով լուրջ հետընթաց է գրանցվել, այդ թվում՝ տնտեսության ոլորտում։ «Առաջընթաց չի եղել նաեւ անվտանգության ապահովման հարցում։ ԵՏՄ–ում Հայաստանի անդամակցության 3 տարիներին Հայաստանի ՀՆԱ–ն դոլարի հաշվարկով կրճատվել է 8 տոկոսով»,– նշեց Մարուքյանը՝ հավելելով, որ զբաղվածության մակարդակը նույնպես 13 տոկոսով կրճատվել է, միջազգային պահուստները պակասել են 40 տոկոսով, իսկ պետական պարտքն աճել է 10 տոկոսով։ Միաժամանակ Մարուքյանը նշեց, որ 2014–ին արտաքին ներդրումները կազմել են 267.4 մլրդ դրամ այնինչ 2016-ին՝ ընդամենը 81 մլրդ դրամ։
