Ի՞նչ նշանակություն ունի, թե ով է 4 տարի առաջ հրաժարվել Հայաստան-ԵՄ ասոցացման համաձայնագիրը ստորագրելուց: Այս մասին, այսօր՝ նոյեմբերի 27-ին, լրագրողների հետ հանդիպման ժամանակ նշել է Հայաստանում ԵՄ պատվիրակության ղեկավար Պյոտր Սվիտալսկին՝ անդրադառնալով հարցին, որ ՀՀ նախագահ Սերժ Սարգսյանը հայտարարել է, որ 2013 թվականին Ասոցացման համաձայնագրի ստորագրումից հրաժարվող կողմը եղել է Եվրամիությունը, իսկ ԵՄ պաշտոնյաներն էլ պնդում են, որ վերջին պահին Հայաստանն է հրաժարվել ԵՄ ասոցացումից:
Հարցին, թե ի վերջո, ո՞վ 4 տարի առաջ հրաժարվեց ասոցացման համաձայնագրից, Սվիտալսկին պատասխանեց. «Դա ի՞նչ նշանակություն ունի: Եկեք ապագային նայենք, չեմ կարծում, որ ժամանակ է անցյալին նայելու եւ կրկնելու այն զգացմունքները, որ կային 2013-ին: Հիմա մենք գիտենք, որ սա շատ կարեւոր համաձայնագիր է, որը տարբերվում է ասոցացման համաձայնագրից: Սա խորը եւ ազատ առեւտրի մասին համաձայնագիր չէ, բայց ԵՄ-ն առաջնորդվում է իր գործընկերների մղումներով: Այսօր սխալ է խոսել այն մասին, որ ԵՄ-ն ինչ-որ բան է պարտադրում: Ճիշտ կլիներ խոսել դրա մասին, եթե նոր համաձայնագիրը նման լիներ 4 տարի առաջվա համաձայնագրին»:
Նրա խոսքով, երկու կողմն էլ պատրաստակամ են եղել նոր որակի համաձայնագիր ունենալու համար, որը չի խանգարի այլ պարտավորությունների. «Սա արտացոլում է այս պահին եղած բոլոր հնարավորությունները, եկեք առավելագույնը քաղենք այս համաձայնագրից: Ես չէի ուզենա անցյալ գնալ եւ վերլուծել, թե ինչ եղավ 4 տարի առաջ»: