ԱԺ Արտաքին հարաբերությունների մշտական հանձնաժողովում այսօր՝ նոյեմբերի 29-ին, «Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ» հայտարարության նախագիծը քննարկվելուց հետո դրվեց քվեարկության եւ մերժվեց։
Քվեարկության ժամանակ «Ելք» խմբակցության պատգամավոր Արամ Սարգսյանի հետ խոսքուզրույցի բռնված ՀՀԿ-ական Հերմինե Նաղդալյանի ձեռքը բարձրացրեց Արմեն Աշոտյանը։ Դիտարկմանը, թե Աշոտյանը ուղղորդում է Նաղդալյանին, Աշոտյանն ասաց․ «Չեմ ուղղորդում, հուշում եմ»։
Բացի դրանից, «Ելք»-ից Էդմոն Մարուքյանը նույնպես քվեարկության ժամանակ բարձրացրեց ձեռքը, ինչին Արմեն Աշոտյանը արձագանքեց. «Դուք չեք քվեարկում, հանձնաժողովի անդամ չեք»,ապա կատակով ավելացրեց. «Լցոնում եք անում, պարոն Մարուքյան»:
Միայն «Ծառուկյան» խմբակցության պատգամավոր Արարատ Զուրաբյան սկզբում քվեարկեց «ձեռնպահ», ապա խնդրեց շտկել իր քվեն որպես «կողմ»։ Կողմ քվեարկեց նաեւ «Ելք» խմբակցությունից Արտակ Զեյնալյանը: Մնացած բոլորը դեմ էին:
Ամեն դեպքում, նախագիծը բացասական եզրակացությամբ ընդգրկվեց հաջորդ լիագումար նիստի օրակարգ, որի ժամանակ հակիրճ կներկայացվի նախագծի պահանջը:
Նշենք, որ «Ելք» խմբակցության ներկայացրած օրինագծում, մասնավորապես նշվում է. «Հայաստանի Հանրապետության կողմից Եվրասիական տնտեսական միությանը (այսուհետ՝ ԵՏՄ) միանալու արդյունքում էական հետընթաց է տեղի ունեցել սոցիալ-տնտեսական մի շարք ոլորտներում, ինչպես նաեւ չի ամրապնդվել Հայաստանի Հանրապետության անվտանգությունը:
Հիշեցնենք, որ այս քննարկումը պետք է տեղի ունենար սեպտեմբերի 27-ին, սակայն հիմնական զեկուցողի՝ Էդմոն Մարուքյանի, բացակայության պատճառով հետաձգվել էր:
