Եթե ԵՏՄ-ի դուրս գալը կապված է Ռուսաստանի հետ, ապա չմոռանանք, որ հենց Ռուսաստանն է առատորեն զենք մատակարարում մեր հակառակաորդին։ Այս մասին այսօր՝ նոյեմբերի 29-ին, ԱԺ Արտաքին հարաբերությունների մշտական հանձնաժողովում «Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ» հայտարարության նախագծի քննարկման ժամանակ հայտարարեց «Ելք» խմբակցության պատգամավոր Արարատ Միրզոյանը։
«Երբ խոսում ենք ԵՏՄ-ից դուրս գալու մասին, ասում են, բա ԵՄ-ն սենց, բա ԵՄ-ն «քըխ» է, հիմա էլ ասում են՝ տեսա՞ք, ԵՄ-ի հետ էլ վատ չենք: Եղբայր, մենք ԵՄ-ից չենք խոսում: Երբ ասում եք, որ, լինելով ԵՏՄ անդամ, ԵՄ-ի հետ էլ համագործակցությունը հնարավոր է, մենք չենք քննարկում ԵՄ-ի հետ համագործակցությունը, այլ ասում ենք, որ ԵՏՄ-ն մեր տնտեսական շահերին վնասում է։ Վնասում է, քանի որ Վրաստանի եւ Իրանի հետ հարաբերությունները չենք կարողանում զարգացնել»,-նշեց նա։
Արարատ Միրզոյանի կարծիքով՝ քննարկումներից կարելի է արձանագրել, որ իշխող կուսակցությունը եւ ընդդիմության մի մասը ընդունում են, որ բարձրացված հարցը աշխարհաքաղաքական հարց է, քանի որ վախենում եք, որ Ռուսաստանը մեզ վատություն կանի։
«Ես լավատես չեմ պարոն Զեյնալյանի պես, չեմ հավատում, որ վերապահումով կողմ կքվեարկեք։ Ավելին, չեմ կարծում, որ պարոն Աշոտյանը միամիտ է, ասեմ այլ բան՝ պարոն Աշոտյան, դուք ամենեւին միամիտ չեք»,-ընդգծեց նա։
