ՀԱՊԿ անդամ պետությունների ղեկավարները հայտարարել են, որ անթույլատրելի է միջպետական խնդիրները եւ միջազգային վեճերը լուծել ուժի կիրառման կամ սպառնալիքի միջոցով, միջկրոնական եւ միջազգային անհանդուրժողականության բորբոքման ճանապարհով եւ պետականության ոչնչացման այլ մեթոդներով, այդ թվում «գունավոր հեղափոխությունների» եւ «հիբրիդային պատերազմների» տեխնոլոգիաների կիրառմամբ:
Այս մասին ասվում է Հավաքական անվտանգության պայմանագրի կազմակերպության պետությունների ղեկավարների հռչակագրում՝ Հավաքական անվտանգության պայմանագրի 25-ամյակի եւ ՀԱՊԿ 15-ամյակի կապակցությամբ:
Հայտարարության մեջ նշվում է, որ միջազգային հարաբերություններում հակամարտությունների ներուժի պահպանման համատեքստում պետությունները համոզիչ ջանք են գործադրել, որպեսզի Կազմակերպությունը կարողանա երաշխավորված պատասխան տալ իրավիճակի ապակայունացման ցանկացած փորձի դեպքում, խաղաղությունը խախտելու եւ իր պատասխանատվության ոլորտում անվտանգության ապահովման համար:
«Մենք՝ ՀԱՊԿ անդամ երկրներս, հիմք ենք ընդունում այն, որ Կազմակերպության ձեւավորված նորմատիվ իրավական բազան թույլ է տալիս անդամ պետությունների համագործակցությունը որակապես նոր մակարդակի հասցնել, ամրապնդել մեր պետությունների ռազամավարական նպատակների ընդհանրությունը եւ ՀԱՊԿ-ն փոխակերպել գործող բազմաֆունկցիոնալ միջազգային կառույցներից մեկի, որը տարածաշրջանային մակարդակում կկարողանա անվտանգություն ապահովել:
Մենք հատուկ ուշադրություն ենք դարձնում կազմակերպության շրջանակներում ռազմական, ռազմատեխնիկական, ռազմատնտեսական համագործակցության հետագա զարգացման անհրաժեշտությանը:
Մեզ՝ ՀԱՊԿ անդամ երկրների պետության ղեկավարներիս, միջազգային ահաբեկչության եւ ծայրահեղականության աճող սպառնալիքները, զենքի եւ թմրանյութերի ապօրինի շրջանառությունը, ապօրինի միգրացիայի, տեղեկատվական եւ հաղորդակցական տեխնոլոգիաները ապակառուցողական ազդեցության նպատակով օգտագործելը եւ հանրային գիտակցության մանիպուլյացիան առաջնորդեցին ՀԱՊԿ-ին զարգացնել իր ներուժը
ավանդական եւ նոր անվտանգության մարտահրավերներին արձագանելու համար, այդ թվում պետական սահմանների պահպանման ոլորտում փոխգործակցության հարցերով եւ այս առումով վերահաստատում ենք Հավաքական անվտանգության պայմանագրի կազմակերպության անդամ երկրների ղեկավարների պետական սահմանների պաշտպանության ապահովման մասին հայտարարությունը, որն ընդունվել է 2016-ի հոկտեմբերի 14-ին՝ Երեւանում, ՀԱՊԿ Հավաքական Անվտնմագության խորհրդի նստաշրջանում:
Մենք կոչ ենք անում ՄԱԿ անդամ պետություններին, միջազգային եւ տարածաշրջանային կազմակերպություններին, ինչպես նաեւ ողջ համաշխարհային հանրությանը միավորել միջազգային ահաբեկչության դեմ պայքարի համապարփակ կոալիցիայի շրջանակներում` ՄԱԿ կանոնադրության եւ ՄԱԿ Անվտանգության խորհրդի համապատասխան բանաձեւերի հիման վրա », - նշվում է հայտարարության մեջ:
