Եվրամիության նոր համալրումը ոչ մի կերպ չի կարողանա փոխհատուցել միությունից Մեծ Բրիտանիայի դուրս գալը: Այս մասին NEWS.am-ի հետ զրույցում ասաց ՌԳԱ Համաշխարհային տնտեսության եւ միջազգային հարաբերությունների ինստիտուտի գիտաշխատող, քաղաքագետ, թուրքագետ Վիկտոր Նադեին Ռեւսկին:
Նրա խոսքով՝ Սերբիայի եւ Ալբանիայի անդամակցության մասին որոշումերը վաղուց են ընդունվել: «Այս որոշումներն ընդունվել են դեռեւս մինչեւ բրեքսիթը եւ Եվրամիությունից Մեծ Բրիտանիայի դուրս գալը»,- հիշեցրեց քաղաքագետը՝ հավելելով, որ Մեծ Բրիտանիայի դուրս գալուց հետո նոր անդամների միանալը կարող է ԵՄ դիրքերը թեթեւակի ամրապնդել, սակայն տեղի չեն ունենա արմատական դրական փոփոխություններ, քանի որ այս երկրների տնտեսությունները, իրենց հնարավորություններով եւ պոտենցիալով, չեն կարող համեմատվել Միացյալ Թագավորության տնտեսության հետ:
Միեւնույն ժամանակ, ինչպես նշեց, Նադեին Ռաեւսկին, Մեծ Բրիտանիան շատ խոշոր խաղացող է՝ ոչ միայն նրա տնտեսությունը հաշվի առնելով, այլեւ քաղաքական բաղադրիչը:
Հիշեցնենք, որ ԵՄ հարեւանության եւ ընդլայնման քաղաքականության եվրահանձնակատար Յոհաննես Հանը նոյեմբերի 28-ին հայտարարել էր անդամ երկրների պատրաստակամության մասին քննարկելու Բալկանյան տարածաշրջանի նոր երկրների անդամակցության հարցը:
