Տրանսպորտային ոլորտի խնդիրները եւ վարորդական իրավունքի տրամադրման հարցերը ոչ մի ընդհանուր բան չունեն ԵՏՄ Մաքսային օրենսգրքի կիրառման հետ: Այս մասին դեկտեմբերի 5-ին ԱԺ նիստում «Եվրասիական տնտեսական միության Հարկային օրենսգրքի մասին» պայմանագրի վավերացման հարցի քննարկման ժամանակ ասաց Պետական եկամուտների կոմիտեի փոխնախագահ Վախթանգ Միրումյանը՝ պատասխանելով «Ելք» դաշինքի պխմբակցության ղեկավար Նիկոլ Փաշինյանի հարցին ԵՏՄ անդամ երկրների կողմից երաշխիքների մասին, որոնք կնպաստեին հայ ձեռներեցների իրավունքների պաշտպանությանը: Ընդդիմադիրը որպես օրինակ բերեց ժամանակին աղմկահարույց հարցը Ռուսաստանում վարորդական իրավունքի տրամադրման մասին:
Միրումյանի խոսքով՝ ընդամենը 2 երաշխիք կա: «Առաջինն այն է, որ ԵՏՄ Մաքսային օրենսգրքում ամրագրված դրույթները պետք է պարտադիր կատարվեն»,- նշեց ՊԵԿ փոխնախագահը՝ հավելելով, որ երկրորդ երաշխիքն այն է, որ եթե ապօրինի գործողություններ կան, ապա ԵՏՄ Մաքսային օրենսգիրքը նախատեսում է մաքսային կառույցների եւ մարմինների անմիջական համագործակցություն՝ առաջացած խնդիրները կարգավորելու համար:
