Արգենտինայի իշխանությունների ներկայացուցիչներից պաշտպանության նախարար Օսկար Ագուադն առաջինն է հրապարակայնորեն խոստովանել, որ նոյեմբերի 15-ին կորած San Juan սուզանավի անձնակազմի բոլոր 44 անդամները զոհվել են: Նա այս մասին հայտարարել է Todo Noticias հեռուստաալիքի հետ հարցազրույցում:
Լրագրողի հարցին՝ կարելի՞ է համարել, որ սուզանավի բոլոր նավաստիները զոհվել են, Արգենտինայի ռազմական գերատեսչության ղեկավարը պատասխանել է. «Միանգամայն ճիշտ է»:
Նա պարզաբանել է, որ ավելի վաղ ընդունված փրկարարական գործողությունը դադարեցնելու եւ սուզանավի որոնումների վրա կենտրոնանալու որոշումը պայմանավորված է այն հանգամանքով , որ «էքստրեմալ պայմանները եւ սուզանավի անհետանալու պահից անցած ժամանակահատվածը ողջ մնալու ոչ մի հնարավորություն չեն տալիս»: Ագուադը հիշեցրել է միջազգային նորմերի գոյության մասին, որոնք ժամանակային սահմանափակում են սահմանում, որից հետո պետք է անցնել որոնողական գործողության հաջորդ փուլին:
San Juan սուզանավի հետ կապն ընդհատվել էր նոյեմբերի 15-ին, նոյեմբերի 16-ին սկսվել էին սուզանավի որոնողական գործողությունները, որին մասնակցել են մի շարք երկրներ: Նոյեմբերի 30-ին Արգենտինայի ՌԾՈւ-ն հայտնել է անձնակազմի փրկության գործողության դադարեցման մասին: Նավաստիների ազգականները դիմել են երկրի նախագահին՝ վերանայելու փրկարարական գործողությունը դադարեցնելու որոշումը:
