Վայոց Ձորի, Արմավիրի, Գեղարքունիքի, Արագածոտնի, Լոռու, Կոտայքի եւ Տավուշի մարզերը ներկայացնող 18 գործարար դեկտեմբերի 1-2-ը մասնակցել են «Մարքեթինգ եւ վաճառք հյուրատների համար» խորագրով դասընթացին: Այն կազմակերպվել էր Հայաստանի ՓՄՁ զարգացման ազգային կենտրոնի եւ նրա գործընկերներ` «Ի-վի քոնսալթինգ» խորհրդատվական ընկերության կողմից` ԱՄՆ Միջազգային զարգացման գործակալության ֆինանսավորմամբ իրականացվող «Գործընկերություն՝ հանուն գյուղական համայնքների բարգավաճման» (USAID/PRP) ծրագրի շրջանակում:
Երկօրյա դասընթացը վարում էր հյուրատնային եւ հյուրընկալող բիզնեսում տարիների փորձ ունեցող խորհրդատու Դիանա Ավետյանը: Դասընթացի առաջին օրվա ընթացքում մասնավոր փոքր հյուրատների տնօրենները եւ սեփականատերերը լսեցին, թե ինչ պետք է անել իրենց շուկան եւ առնչվող ծառայություններն ավելի լավ ճանաչելու համար, ինչպես տարբերվել տեղական եւ գլոբալ մրցակիցներից, ինչպես ապահովել առցանց ներկայություն՝ սեփական վեբկայքի եւ սոցցանցերում բացված էջերի միջոցով: Մասնակիցները նաեւ ծանոթացան հյուրերի համար «Տան կանոնակարգ» սահմանելու քայլերին:
Դասընթացի երկրորդ օրվա ընթացքում հյուրատների ղեկավարները տեղեկացան ոլորտի համակարգերի եւ չափորոշիչների, ինչպես նաեւ հյուրերի սպասարկման յուրահատկությունների մասին: Միջոցառման վերջում հյուրատների ներկայացուցիչները ծանոթացան քայլերին, որոնք անհրաժեշտ է ձեռնարկել, եթե իրենց հյուրատունը գտնվում է հիմնական զբոսաշրջային երթուղիներից հեռու:
Դիանա Ավետյանը կարեւորեց, որ պետք է հետեւել ոլորտի եւ ընդհանուր շուկայի զարգացման միտումներին եւ յուրաքանչյուր հաճախորդին առաջարկել նրա կարիքները բավարարող ծառայություններ: Փորձագետը նաեւ շեշտեց, որ մասնակիցներն ուշադրություն դարձնեն հատկապես թվային դարաշրջանում հաճախորդների նախասիրությունների փոփոխություններին:
«Ի-վի քոնսալթինգի» ծրագրերի ղեկավար Սեւակ Հովհաննիսյանը նշեց, որ «Գործընկերություն՝ հանուն գյուղական համայնքների բարգավաճման» (USAID/PRP) ծրագրի շրջանակում սա հերթական դասընթացն էր ծրագրի շահառուների համար: «USAID/PRP ծրագրի կարեւորագույն բաղադրիչներից մեկը մեր շահառուների համար նոր շուկաների հասանելիությունն ապահովելը եւ նրանց մարքեթինգային աջակցություն տրամադրելն է: Այդ առումով մարքեթինգային հմտություններ գիտելիք տրամադրող դասընթացները կարեւոր նշանակություն ունեն»,- ասաց Հովհաննիսյանը: Նա նաեւ շնորհակալություն հայտնեց Հյուրատների զարգացման հայկական ասոցիացիային, որն աջակցել է դասընթացի կազմակերպմանը: «Մեր հյուրատներից շատերը կարիք ունեն նման դասընթացների, որոնց շնորհիվ գործարարները կկարողանան ավելի շատ հաճախորդ ներգրավել եւ զարգացնել իրենց ծառայությունները»,- շեշտեց ասոցիացիայի նախագահ, դասընթացի մասնակից Օֆելյա Պետրոսյանը:
Մարքեթինգի եւ շուկայում շահառուների առաջ մղման միջոցառումներն իրականացվում են «Գործընկերություն՝ հանուն գյուղական համայնքների բարգավաճման» (USAID/PRP) ծրագրի բաղադրիչներից մեկի շրջանակում: Ծրագրի մյուս բաղադրիչներն են ընտրված համայնքներում տեղական տնտեսական զարգացումը, ենթակառուցվածքների զարգացումը եւ բնության պահպանությունը:
Նշենք, որ 2013 թ. օգոստոսից Հայաստանում մեկնարկել է ԱՄՆ Միջազգային զարգացման գործակալության «Գործընկերություն` հանուն գյուղական համայնքների բարգավաճման» (USAID/PRP) հնգամյա ծրագիրը: Հայաստանի ՓՄՁ զարգացման ազգային կենտրոնի գլխավորությամբ ծրագիրն իրականցնում են Գեղարքունիքի առեւտրաարդյունաբերական պալատը, «Ի-Վի Քոնսալթինգ» կազմակերպությունը եւ «Ագրոբիզնեսի եւ գյուղի զարգացման կենտրոնը» (CARD): USAID/PRP ծրագրի հետ կապված հարցերի համար կարող եք կապվել «Հայաստանի փոքր եւ միջին ձեռնարկատիրության զարգացման ազգային կենտրոն» հիմնադրամի (ՓՄՁ ԶԱԿ) հետ: