Հայտնի է դարձել, որ անհետանալուց կարճ ժամանակ առաջ արգենտինական San Juan սուզանավի կապիտանը տեղի ունեցած վթարի պատճառով 8 անգամ զանգել է ռազմածովային բազա: Երկրի ՌԾՈւ ներկայացուցիչ Էնրիկե Բալբին հաստատել է, որ սուզանավը վերջին կապից առաջ գիշերը մի քանի անգամ կապ է հաստատել:
Տեղական հեռուստաալիքի տրամադրության տակ է հայտնվել արբանյակային կապի ծառայություններ մատուցող Tesacom ընկերության զեկույցը, փոխանցում է ՏԱՍՍ-ը: Փաստաթղթից հետեւում է, որ անձնակազմը նոյեմբերի 15-ին 8 զանգ է կատարել: Դրանից հետո սուզանավն արդեն կապի մեջ չի մտել, զանգերի ընդհանուր տեւողությունը կազմել է մոտ 55 րոպե: «Փաստերի խեղաթյուրումից խուսափելու համար» անձնակազմը ամբողջ տեղեկատվությունը գրավոր է փոխանցել:
San Juan սուզանավի հետ կապն ընդհատվել էր նոյեմբերի 15-ին: Սուզանավի անհետանալու օրը անձնակազմը հրամանատարությանը տեղեկացրել է մարտկոցային բաժին ջուր լցվելու մասին, որը կարճ միացում եւ բռնկում է առաջացրել:.
Սուզանավի որոնումները սկսվել են նոյեմբերի 16-ին: Նոյեմբերի 30-ին Արգենտինայի ՌԾՈւ-ն հայտնել է փրկարարական գործողության դադարեցման մասին: