Կոտայքի մարզում նախնական տվյալով Հրազդանի քաղաքապետ Արամ Դանիելյանի անչափահաս որդու մասնակցությամբ մահվան ելքով վրաերթի գործով նախաքննությունը շարունակվում է:
NEWS.am-ի հետ զրույցում քաղաքապետի որդու՝ Ռազմիկ Դանիելյանի պաշտպան Հայկ Սարգսյանը հայտնեց, որ փորձաքննություններ կան, որոնց պատասխանը դեռ չի ստացվել:
«Իմ պաշտպանյալն առաջադրված մեղադրանքի վերաբերյալ դիրքորոշում չի հայտնել»,- ասաց պաշտպանը:
Հիշեցնենք, որ նախնական տեղեկություններով, 2017թ. հունիսի 8-ին հոր ծառայողական մեքենայով Հրազդանի քաղաքապետի որդին վրաերթի էր ենթարկել Հրազդանի բնակիչ 58-ամյա Վալերի Թորոսյանին, որն ավելի ուշ հիվանդանոցում մահացել էր:
Արամ Դանիելյանի որդուն մեղադրանք է առաջադրվել Քրեական օրենսգրքի 242-րդ հոդվածի 2-րդ մասով՝ Ճանապարհային երթևեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ: Նա ստորագրությամբ ազատ էր արձակվել:
