Իրանի նախագահ Հասան Ռոհանին ԱՄՆ որոշումը՝ ճանաչել Երուսաղեմը որպես Իսրայելի մայրաքաղաք «սադրիչ եւ վտանգավոր քայլ» է համարում, հաղորդում է Tasnim-ը:
Իր թուրք գործընկեր Ռեջեփ Թայիփ Էրդողանի հետ հեռախոսազրույցում Իրանի նախագահը նշել է, որ մուսուլմանական պետությունները պետք է միավորվեն եւ դիմակայեն Միացյալ Նահանգների «սխալ, ապօրինի, սադրիչ եւ շատ վտանգավոր» գործողություններին:
Նա նաեւ ողջունել է Թուրքիայի նախագահի՝ Ստամբուլում Իսլամական համագործակցության կազմակերպության (ԻՀԿ) արտահերթ գագաթաժողով անցկացնելու նախաձեռնությունը՝ այդ հարցը քննարկելու համար: Նա նշել է, որ Իրանը ընդունում է գագաթաժողովի հրավերը:
Նրա խոսքով՝ ԱՄՆ եւ Իսրայելի նման անօրինական գործողությունները կարող են Պաղեստինում եւ ամբողջ տարածաշրջանում անկայունություն առաջացնել:
Իր հերթին Էրդողանը նշել է, որ ԱՄՆ նախագահ Դոնալդ Թրամփի որոշումը մուսուլմանական աշխարհի ներքին երկպառակությունների արդյունքն է՝ ընդգծելով, որ իսլամական պետությունները պետք է միավորվեն եւ հակազդեն Վաշինգթոնի գործողություններին: