Մեծ Բրիտանիայի թագուհի Եղիսաբեթ II-ը հինգշաբթի կմասնակցի երկրի պատմության մեջ ամենախոշոր ավիակրի «մկրտության» արարողությանը, փոխանցում է «ՌԻԱ Նովոստի»-ն:
«Ահագնացող գլոբալ սպառնալիքների աշխարհում այս հիանալի նավը կդառնա Մեծ Բրիտանիայի եւ մեր համախոհների արժեքների պահպանության շարժական ուժը: Մեծ պատիվ է բարձրանալ նավ եւ հանդիպել իր գործին այդքան նվիրված անձնակազմի հետ»,- ասել է երկրի պաշտպանության նախարար Գեւին Ուիլյամսոնը:
Նա վստահություն է հայտնել, որ թագուհին նույնպես կտպավորվի նոր նավի «մկրտության» արարողության ժամանակ, «որը հպարտորեն իր անունն է կրելու»:
Նավի «մկրտության» արարողությունը տեղի է ունենալու Փորթսմուտի նավահանգստում, որին կցվելու է ավիակիրը:
Queen Elizabeth-ը, որն անվանվել է ի պատիվ թագուհի Եղիսաբեթի, Մեծ Բրիտանիայում կառուցված ամենախոշոր ռազմանավն է: Այն կարող է կրել թվով մինչեւ 40 ինքնաթիռ եւ ուղղաթիռ:
Հունիսին, մեկնաբանելով բրիտանական ռազմական գերատեսչության այն ժամանակվա ղեկավար Մայքլ Ֆելոնի՝ ռուսական ավիակիր «Ադմիրալ Կուզնեցով»-ին Queen Elizabeth-ի գերազանցելու մասին հայտարարությունը՝ ՌԴ Պաշտպանության նախարարության պաշտոնական ներկայացուցիչ Իգոր Կոնաշենկովը հայտարարել էր, որ բրիտանական ավիակիրը «հարմար ծովային թիրախ է»:
