Գյումրիում կյանքը պրինցիպիալ փոխվելու է: Այս մասին, այսօր՝ դեկտեմբերի 7-ին, Գյումրի կատարած այցելության ժամանակ լրագրողների հետ զրույցում նշել է ՀՀ վարչապետ Կարեն Կարապետյանը։
«Մենք ռեգուլյար, ամեն օր պետք է աշխատենք, որպեսզի այստեղ կյանքը փոխվի, եւ իրականում փոխվելու է։ Այն պրոբլեմները, որն այսօր Գյումրին ունի, մեր ժողովուրդն ունի, հաղթահարելի են։ Ուղղակի պետք է դրան լավատեսությամբ նայել եւ համապատասխանաբար աշխատել», - հայտարարեց Կարեն Կարապետյանը։
Հարցին, թե ե՞րբ են աշխատատեղեր բացվելու, վարչապետը պատասխանեց. «Ամեն օր դրա վրա ենք աշխատում, պայմանները ստեղծում ենք, որ բիզնեսը գա աշխատատեղ ստեղծի, ենթակառուցվածքները, հատուկ ծրագիր ունենք»:
Գյումրեցիները հետաքրքրվեցին նաեւ, թե ի՞նչ է անում կառավարությունը Շիրակի մարզում աղքատությունը մեղմացնելու համար, ինչին Կարեն Կարապետյանն արձագանքեց. «Ամբողջ կառավարության ծրագիրը դրան է ուղղված»:
Նշենք, որ ՀՀ վարչապետ Կարեն Կարապետյանը Գյումրիում հարգանքի տուրք է մատուցել 1988 թվականի երկրաշարժի անմեղ զոհերի հիշատակին: Նա մասնակցել է Սուրբ Ամենափրկիչ եկեղեցու բակում մատուցվող ոգեկոչման արարողությանը: Ոգեկոչման արարողությունը կատարել է Շիրակի թեմի առաջնորդ Միքայել եպիսկոպոս Աջապահյանը: Ներկաները ծաղկիկներ եւ ծաղկեպսակներ դրեցին զոհերի հիշատակը հավերժացնող հուշակոթողին:
