Հայաստանը կարող է զբոսաշրջիկների ուշադրությունը գրավել իր մշակութային ավանդույթների ցուցադրման միջոցով: Այս մասին դեկտեմբերի 8-ին լրագրողների հետ հանդիպման ժամանակ ասաց բնապահպան, «Հայկական Ամանորը Արդվիում» նախաձեռնության հեղինակ, Լոռու մարզի նշված գյուղի բնակիչ Կարինե Փանոսյանը:
Նրա խոսքով՝ հայկական մշակույթն այնքան հարուստ է, որ կարող է հեշտությամբ լրացնել այլ երկրների ու ժողովուրդների մշակույթը: «Ցավոք, ժամանակակից ամանորյա սեղանը այն ճաշատեսակներից է կազմված, որոնք հայկական ավանդական ամանորյա սեղանի հետ ընդհանուր ոչ մի բան չունեն կամ գրեթե չունեն»,- դժգոհեց Փանոսյանը:
Նշելով ժամանակակից ամանորյա սեղանի թերությունները՝ բնապահպանը թվարկեց նաեւ այն ճաշատեսակները, որոնք ավանդաբար զարդարել են հայկական ավանդական սեղանը: Այսպես՝ նրա խոսքով, հայկական ավանդական սեղանին պետք է լինեն նաեւ ժամանակակից ամանորյա սեղանի համար սովորական դոլման, «տարեհացը», չրերի 7 տեսակ եւ մրգի նույնքան տեսակ, 7 տեսակի պասի ճաշատեսակներ:
