Ամերիկյան Apple ընկերությունը մտադիր է շուտով ձեռք բերել Shazam ծառայություն, որի օգնությամբ կարելի է ճանաչել մեղեդիներն ու պատկերները։ Այս մասին հայտնում է «Կոմերսանտ ռու»-ն՝ վկայակոչելով ամերիկյան TechCrunch առցանց պորտալը։
Պորտալի աղբյուրների տեղեկություններով՝ այդ մասին համաձայնագիրը կկնքվի արդեն այս շաբաթ։ Գործարքի մասին ենթադրաբար կհայտնեն դեկտեմբերի 11-ին։ Պարբերականը նշում է, որ աղբյուրներից մեկի տեղեկություններով՝ գործարքի գումարը կկազմի մոտ 400 մլն դոլար։ Հրապարակման մեջ ասվում է, որ որոշ գնահատականներով՝ Shazam –ի արժեքը կարող է գերազանցել 1 մլրդ դոլարը։
Apple-ի ու Shazam-ի պաշտոնական ներկայացուցիչները հրաժարվել են մեկնաբանել գործարքի մասին տեղեկությունները։
Սեպտեմբերից Shazam-ի ներկայացուցիչները հայտնել են, որ հավելվածը, որը անհրաժեշտ է ծառայության գործածման համար, ներբեռնվել է 1 մլրդ անգամ։ Shazam Entertainment ընկերությունը, որին պատկանում է այդ ծառայությունը, վերջին տարիներին կորուստներ է կրել։ 2014-ի գնահատականներով Shazam-ի ակտիվ օգտատերերի քանակը կազմել է 100 մլն, հավելվածն այդ պահին տեղադրված էր մոտ 500 մլն բջջային սարքերի վրա։