Արմավիրի մարզի Նորապատ գյուղում հրդեհից տուժած բնակիչների բնակարանային խնդիրը դեռեւս չի լուծվել: Այս մասին NEWS.am-ի հետ զրույցում ասաց Արմավիրի փոխքաղաքապետ Մելիք Բաղդասարյանը` նշելով, որ բնակիչները հրաժարվել են իրենց առաջարկած տարբերակներից:
«Բնակիչներն իմ տեղեկություններով տարբեր տեղերում են բնակվում, բարեկամների տներում, կան որ նաեւ վարձով են բնակվում: Մենք իրենց քոթեջային թաղամասում ենք առաջարկել, որ բնակվեն, ճիշտ է, էլի վարձով, բայց իրենք հրաժարվում են, ցանկանում են մոտակայքում բնակվել»,-ասաց փոխքաղաքապետը` նշելով, որ քաղաքապետարանը չի կարող բնակիչներին նոր բնակարաններ հատկացնել:
Նշենք, որ յուրաքանչյուր շնչին հրդեհից հետո հատկացվել էր 160 հազարական դրամ` առաջնային կարիքները հոգալու համար:
Ավելի վաղ NEWS.am-ը հայտնել էր, որ այս տարվա հոկտեմբերի 22-ին, ժամը 22:00-ի սահմաններում ԱԻՆ Փրկարար ծառայության օպերատիվ կառավարման կենտրոն ահազանգ էր ստացվել, որ Նորապատ գյուղի նախկին դատարանի շենքում, որտեղ բնակվում է 14-ից ավելի ընտանիք, խոշոր հրդեհ է բռնկվել: Դեպքի վայր էր մեկնել հինգ մարտական հաշվարկ, արտակարգ իրավիճակների արձագանքման եւ օպերատիվ խմբերը: Հայտարարվել է հրդեհի բարդության 3-րդ աստիճան. դեպքի վայր է մեկնել եւս երեք մարտական հաշվարկ:
Ավելի ուշ հայտնի էր դարձել, որ հրդեհից առաջ ուժեղ պայթյուն է տեղի ունեցել: Շենքը երկհարակնի է եւ այն ամբողջովին վերածվել է մոխրակույտի:
