Մարդիկ, որ երկար են մնում մի տեղ, լճանում են։ Այս կարծիքին է պաշտպանության նախկին փոխնախարար Արա Նազարյանը, որը Վիգեն Սարգսյանի նշանակվելուց հետո ազատվեց աշխատանքից եւ արտակարգ իրավիճակների նախարարությունում նշանակվեց փոխնախարար։

NEWS.am–ի հետ զրույցում Արա Նազարյանը հայտարարեց, որ  նախարարությունից իր հեռանալը սերնդափոխության համատեքստում էր, իսկ իր նախկին գործընկեր  Զինված ուժերի գլխավոր շտաբի պետի տեղակալ Հայկազ Բաղմանյանի ազատվելու մասին որեւէ գնահատական  չի կարող տալ։ «Ինձ հետաքրքրել է ծառայելը Հայաստանի Հանրապետությանը, ես ծառայել եմ, ինձ չի հետաքրքրում մնացածը։ Նախարարության կերպարը փոխվելու մասին հարցեր ուղղեք նրանց, որոնք նախարարությունում են, ես հիմա ուրիշ նախարարությունում եմ, իմ մասով ասել եմ՝ սերնդափոխություն է, նորմալ է, մյուս մասով էլ երեւի սերնդափոխություն է։ Պիտի թարմացվի, չէ՞, մարդիկ որ երկար են մնում մի տեղ լճանում են, պիտի փոխվի»,–ասաց Արա Նազարյանը։

Հարցին՝   կադրային այս փոփոխությունները բարեփոխում համարո՞ւմ է, Նազարյանը պատասխանեց. «Ցանկալի է, որ բերի բարեփոխման, էդ բարի բառը լավ բառ է, պետք է ամեն մեկի միջից բարություն դուրս գա, բայց մենք կյանքը սկսում ենք չարությունով։  Մամուլի 99 տոկոսը վատ բաների մասին է, չար բաներ են, մարդուն սթրեսի մեջ եք մտցնում, անընդհատ վատ բան եք գրում, լավ բաներ գրեք, մարդիկ ուրախանան»,–նեղսրտեց Նազարյանը։

ՊՆ նախկին պաշտոնյայից հետաքրքրվեցինք՝ օրինակ լա՞վ բան է ուսման տարկետման իրավունքը  վերացնելը, միայն  այդքանով հնարավո՞ր է սոցիալական արդարություն հաստատել, համակարգում առկա կոռուպցիան վերացնել, ինչին Նազարյանն արձագանքեց. «Կյանքը ցույց կտա, ես Նաստրադամուսը չեմ։ Տարկետման իրավունքը չի վերացել, ձեւն է փոխվել։ Արդարությունից, որ խոսում է մարդ արարածը.... Եթե մարդը բարոյական արարած լիներ, իրավական նորմ չէր ստեղծվի երբեւէ, բարոյական նորմերով կապրեր, բայց իրավական նորմեր է ստեղծել, որ կարգավորվի։ Այսինքն՝ արդարություն կոչեցյալը հարաբերական է, ոնց կարող է մարդը արդարությունից խոսի, երբ որ օրենք ունի գրված ու դրանով կարգավորվում է իր հարաբերությունները եւ ոչ թե բարոյական նորմերով։ Դրա համար բացարձակ բաներ մի հարցրեք...»։

Արա Նազարյանին հիշեցրինք, որ պաշտպանության նախարար Վիգեն Սարգսյանն էր պնդում, որ այդ փոփոխություններով սոցիալական արդարություն են հաստատելու. «Ինձ այլ նախարարության մասին հարցեր մի ուղղեք, խնդրում եմ»,–ասելիքն ավարտեց Արա Նազարյանը։