Վրաստանի նախկին նախագահ, Օդեսայի նախկին նահանգապետ եւ ուկրաինական ընդդիմադիր «Նոր ուժերի շարժում» կուսակցության ղեկավար Միխայիլ Սաակաշվիլիի մայրը՝ Գիուլի Ալասանիան համարում է, որ իր որդուն Կիեւում ապօրինի են բռնել, փոխանցում է «Գրուզիա օնլայնը»:
«Նրա ձերբակալումը միանգամայն ապօրինի է», - վրացական լրատվամիջոցները նրա խոսքերն են մեջբերում, որը նշում է, որ Ուկրաինայի իշխանությունները «դրանով հանդերձ դեռ հավակնություններ ունեն» ժողովրդավար լինելու եւ ձգտում են դեպի Եվրամիություն:
Մեկնաբանելով Սաակաշվիլիի առողջական վիճակը՝ Ալասանիան հայտարարել է, որ շատ բան չգիտի, բայց տեղյակ է, որ նա մրսել է: Նա նաեւ չի բացառել, որ Սաակաշվիլին կարող է թոքերի բորբոքում ունենալ:
Ավելի վաղ, ինչպես գրում են վրացական լրատվամիջոցները, Սաակաշվիլիի կինը՝ Սանդրա Ռուլոֆսը հայտարարել է, որ Կիեւում իր ամուսնու ձերբակալությունը համարում է «քաղաքական մոտիվներով» պայմանավորված:
«Նրան սպառնում էին մեկ տարի առաջ ընդդիմություն դառնալու պահից ի վեր: Չնայած այդ սպառնալիքներին, նա որոշեց Լեհաստանից վերադառնալ Ուկրաինա եւ շարունակել պայքարը», - նախկին նախագահի կնոջն են մեջբերում լրատվամիջոցները: Ռուլոֆսը կարծում է, որ Ուկրաինայի իշխանությունների նպատակը Սաակաշվիլիին լռեցնելն է: «Դա չի լինի: Ուկրաինացիները միջազգային աջակցությամբ անպայման կհաստատեն, որ քաղաքական հակառակորդների նկատմամբ նմանատիպ վերաբերմունքն անթույլատրելի եւ ապօրինի է»,- կարծում է նա: