«Պերինատոլոգիայի, մանկաբարձության եւ գինեկոլոգիայի կենտրոն»-ում ապրիլի 3-ին մահացած նորածնի գործով նշանակված դատաբժշկական հանձնաժողովային փորձաքննության եզրակացությունը դեռ չի ստացվել: Այս մասին NEWS.am-ին ասաց մահացած փոքրիկի հայրը, տուժողի իրավահաջորդ Մարատ Էմինյանը:
«Քննիչն ասել է, որ եզրակացությունը կստացվի առնվազն վեց ամսվա ընթացքում: Մենք հույս ունենք, որ արդարությունը կվերականգնվի ու մեղավորը կպատժվի»,- ասաց հայրը:
Նշենք, որ ավելի վաղ ստացվել էր դատաբժշկական փորձաքննության եզրակացությունը, որի համաձայն, ըստ հոր, երեխան 7-8 հիվանդություն է ունեցել: Հարազատները, սակայն, այս եզրակացությանը թերահավատորեն են վերաբերվում: Երեխայի ծնողները կատարվածում մեղադրում են կենտրոնի նեոնատոլոգ Գայանե Խաչատուրյանին: Մինչդեռ կենտրոնի տնօրեն Ռազմիկ Աբրահամյանը մեզ հետ զրույցում հայտնել էր, որ նորածնի լեյկոցիտների քանակը եղել է 50 հազար, ինչը ներարգանդային ինֆեկցիայի հետեւանք կարող էր լինել:
«Երեխան ծնվել է անհաս, հաջորդ օրն արդեն վիճակը ավելի է վատացել. ունեցել է շնչարգելություն, հեւոց, կապտություն, եւ պարզվել է, որ լեյկոցիտների քանակը 50 հազար է, նորման 5 հազար է, սա կարող է ծանր ներարգանդային ինֆեկցիայի հետեւանք լինել»,- ասել էր Ռազմիկ Աբրահամյանը:
Ավելի վաղ Քննչական կոմիտեն հայտնել էր, որ «Պերինատոլոգիայի, մանկաբարձության եւ գինեկոլոգիայի կենտրոն»-ում 2017թ. ապրիլի 3-ին նորածին է մահացել: Նախնական տվյալներով՝ համապատասխան ուղեգրով կինն ապրիլի 1-ին տեղափոխվել է ծննդատուն, որտեղ պետք է իրականացվեր կեսարյան հատում։ Ապրիլի 2-ին կինը ծննդաբերել է տղա երեխա, իսկ ապրիլի 4-ին բժիշկները հայտնել են, որ երեխան մահացել է առողջական խնդիրների պատճառով:
Դեպքի առթիվ հարուցվել է քրեական գործ Քրեական օրենսգրքի 130-րդ հոդվածի 2-րդ մասով: