Ֆրանսիայի նախագահ Էմանուել Մակրոնը Ֆրանկոֆոնիայի գագաթաժողովին մասնակցելու համար 2018 թվականի հոկտեմբերին կայցելի Երեւան: Այս մասին դեկտեմբերի 12-ին կայացած ասուլիսում հայտարարել է Հայաստանում Ֆրանսիայի արտակարգ եւ լիազոր դեսպան Ջոնաթան Լաքոտը:
Ըստ վերջինիս՝ տարվա ընթացքում այս մասին կհայտարարվի «առավել պաշտոնապես»: «Սակայն մենք աշխատում ենք այցի կազմակերպման ուղղությամբ», - ավելացրել է դեսպանը:
Միեւնույն ժամանակ դիվանագետը նշեց, որ 2018 թվականը Հայաստանի համար հագեցած կլինի իրադարձություններով, որոնք կարեւոր կլինեն նաեւ Ֆրանսիայի համար: Դրանց թվում դեսպանը առանձնացրեց Հայաստանի առաջին հանրապետության 100-ամյակը, ինչի կապակցությամբ նախատեսվում են Ֆրանսիայի կառավարության ներկայացուցիչների այցեր Հայաստան, Էրեբունիի 2800-ամյակը եւ Սպիտակի երկրաշարժի 30-ամյակը: Դեսպանը նաեւ նշեց, որ այս ողբերգությունը իր հետքն է թողել նաեւ Ֆրանսիայում: Ջոնաթան Լաքոտի խոսքով՝ այդ օրերին ցուցաբերած համերաշխությունը սկիզբ դրեց Հայաստանի անկախացումից առաջ հայ-ֆրանսիական հարաբերություններին:
