Գետինը մտնեն, էդքան հարստանալ պետք չի, էլի: Այս մասին, այսօր՝ դեկտեմբերի 12-ին, ԱԺ-ում լրագրողների հետ զրույցում ասել է ՀՀԿ խմբակցության պատգամավոր, գեներալ Սեյրան Սարոյանն՝ անդրադառնալով թանկացումների խնդրին:

«Որ ամոթ ունենան չեն թանկացնի, գետինը մտնեն, էդքան հարստանալ պետք չի»,-ասել է Սեյրան Սարոյանը:

Անդրադառնալով համայնքապետերի վերաբերյալ Սերժ Սարգսյանի աղմկահարույց ելույթին, որտեղ վերջինս խիստ քննադատության էր ենթարկել որոշ համայնքապետերի վարքը, Սեյրան Սարոյանը նշել է. «Կարող ա ճիշտ չեն ծախսել համայնքապետերը, շատերը գրագիտություն չունեին, ոչ թե գողանում էին, այլ փոշիացնում, չի կարելի փոշիացնել»:

Ավելի վաղ NEWS.am-ը հայտնել էր, որ դեկտեմբերի 9-ին, Սերժ Սարգսյանը տեղական ինքնակառավարման եւ տարածքային կառավարման մարմիններին նվիրված խորհրդաժողովի ժամանակ նշել էր. «Գաղտնիք չէ, որ շատ համայնքապետներ չարաշահում են իրենց պաշտոնը եւ այն օգտագործում են անհասկանալի եւ անընդունելի եկամուտներ ունենալու համար՝ սկսած նրանից, որ տարբեր խորամանկություններով, տարբեր ձեւերով օտարում են համայնքներին պատկանող հողերը, որ անազնիվ վերաբերմունք են ցուցաբերում համայնքային բյուջեների նկատմամբ, եւ չմանրամասնեմ, որովհետեւ ինձ համար շատ տհաճ է այս խոսակցությունը:

Մի բան եմ, ուղղակի, ուզում ասել. շատ ներողամիտ ենք եղել համայնքապետների նկատմամբ: Ներողամիտ ենք եղել, որովհետեւ համարել ենք, որ պետք է կայանան, այս ինստիտուտը պետք է կայանա, եւ այս ընթացքում հնարավոր են որոշակի վատ դրսեւորումներ: Ուզում եմ բոլորիդ, ոչ մեկին չեմ վախեցնում, ուղղակի ուզում եմ բոլորիդ զգուշացնել` եթե որեւէ մեկը պետք է այս գործերով զբաղվի, ավելի լավ է գնա ուրիշ տեղ աշխատի»։