Faсebook ընկերությունը, որին պատկանում է համանուն համաշխարհային խոշորագույն սոցիալական ցանցը, որոշել է հարկեր վճարել այն երկրներում, որտեղ վաճառում է իր արտադրանքը, հայտարարել է ընկերության ֆինանսական ծառայության ղեկավար Դեյվ Ուեները: Այս մասին ասվում է Faсebook ընկերության պաշտոնական հաղորդագրության մեջ, փոխանցում է РБК-ն:
Հայտարարության մեջ նշվում է, որ այսուհետ Facebook-ի ապրանքների ու ծառայությունների եկամտահարկերը, մասնավորապես՝ գովազդային հաղորդագրություններինը, կվճարվեն այն երկրներում, որտեղ կան ընկերության գրասենյակներ, այլ ոչ թե՝ Իռլանդիայի մայրաքաղաք Դուբլինում գտնվող միջազգային գրասենյակի միջոցով:
«Մենք նախատեսում ենք ավարտել այս ուղղությամբ իրականացվող միջոցառումները 2018 թվականի ընթացքում՝ արդեն 2019 թվականի առաջին կեսին հարկային օպերացիաները տեղական գրասենյակներ տեղափոխելու համար», - նշել է Ուեները:
Միեւնույն ժամանակ, Ուեները վստահեցրել է, որ ընկերության գլխավոր գրասենյակը կմնա Կալիֆորնիայիում, որտեղ եւ գտնվում է հիմնական սերվերը: Իսկ Դուբլինում գտնվող գրասենյակը կշարունակի ծառայել որպես միջազգային ստորաբաժանման կենտրոն:
«Մենք հավատում ենք, որ վաճառքի նոր համակարգը մեզ ավելի թափանցիկ կդարձնի ամբողջ աշխարհի պետությունների եւ քաղաքական գործիչների համար, որոնք կոչ են անում ավելի բաց պահել իրենց երկրներում վաճառքների հետ կապված եկամուտները», - ասել է Ուեները:
Հիշեցնենք, որ 2016 թվականի մարտին բրիտանական իշխանություններին հաջողվեց ստիպել ընկերությանը միլիոնավոր հարկեր վճարել գովազդից ստացվող եկամուտներից: Բրիտանացիներից հետո նույն տարվա հուլիսին ԱՄՆ Արդարադատության դեպարտամենտը դատական հայց էր ներկայացրել Facebook-ի դեմ հարկերից խուսափելու մեղադրանքով:
