Արմավիրի, Լոռու եւ Սյունիքի մարզերը ներկայացնող 19 ընկերության ներկայացուցիչ մասնակցեց թվային մարքեթինգին նվիրված դասընթացին: Այն անցկացվեց «Դասընթացներ ՓՄՁ-ների եւ տեղական աշխատուժի համար» դասընթացների շրջանակում: Նախաձեռնությունն իրականացվում է «Հայաստանի փոքր եւ միջին ձեռնարկատիրության զարգացման ազգային կենտրոն» հիմնադրամի (Հայաստանի ՓՄՁ ԶԱԿ)-ի կողմից իրականացվող «Տարածաշրջանային ՓՄՁ-ների մրցունակության խթանումը» ծրագրի շրջանակներում, որը ֆինանսավորում է ԵՄ-ն, համաֆինանսավորում՝ ՀՀ կառավարությունը:
Առաջին դասընթացն անցկացվեց Երեւանում: Մյուս դասընթացները իրականացվելու են Արմավիրի, Վանաձորի եւ Սյունիքի մարզերի ՓՄՁ-ների եւ տեղական աշխատուժի համար: Սեմինարներն իրականացնում է «Բի Էս Սի» Բիզնեսի աջակցման կենտրոնը: «Թվային մարքեթինգ» խորագրով դասընթացի մասնակից ՓՄՁ-ների ներկայացուցիչները հիմնականում հյուրընկալության, արտադրության եւ հանրային սննդի ոլորտից էին:
Դասընթացների կառուցվածքի հիմքում «Բի Էս Սի» Բիզնեսի Աջակցման Կենտրոնի նախագծերից մեկի՝ Quick Start-ի (արագ սկիզբ) մեթոդաբանությունն է: Այն ենթադրում է գործնական գիտելիքների փոխանցում, որոնք հնարավոր է կիրառել գործում՝ անմիջապես դասընթացից հետո:
Դասընթացի ընթացքում մասնակիցները սովորել են, թե ինչից սկսել թվային մարքեթինգը, ինչպես օգտագործել կայքը՝ վաճառքի աճի նպատակով, ինչպես եւ ինչու կիրառել Google Analytics համակարգը: Մասնակցիները նաեւ տեղեկացել են, թե ինչպիսի սոցկայքեր կան եւ ինչպես կիրառել դրանք, էլեկտրոնային նամակներով իրականացվող մարքեթինգի որ գործիքը կիրառել, ինչ նպատակով եւ երբ կիրառել բլոգինգը, ինչպես օգտվել Google AdWords համակարգից: Դասըթնացի ժամանակ նաեւ ներկայացվել է, թե ինչպե՞ս աշխատել որոնողական համակարգերի հետ, ինչպես չափել թվային մարքեթինգի արդյունավետությունը, ինչպես կառավարել թվային մարքեթինգի ամբողջ գործընթացը:
Հաջորդող դասընթացները կիրականացվեն նշված երեք մարզերում՝ «Մարքեթինգ եւ վաճառք», «Կարիերայի զարգացում», «Չրերի արտադրություն» եւ «հյուրընկալություն» թեմաներով:
