Ներկա եւ ապագա վարչապետները պետք է լինեն հեղինակություններ։ Այս մասին այսօր՝ դեկտեմբերի 14-ին NEWS.am-ի հետ զրույցում նշել է ԱԺ պատգամավոր, ՀՀԿ խմբակցության ղեկավար Վահրամ Բաղդասարյանը՝ պատասխանելով հարցին, թե արդյոք պետք է վարչապետը անվիճելի հեղինակություն լինի։

«Ինչ վերաբերում է անվիճելի լինելուն, ապա անվիճելի չի կարող լինել ոչ մեկ մի երկրում, որտեղ բազմակուսակցական համակարգ է գործում»,-նշեց նա՝ ավելացնելով, որ Հայաստանի ապագա վարչապետի լիազորությունները հաշվի առնելով՝  նա պետք է անվիճելի լինի բազմաոլորտ գիտելիքների առումով։

Վահրամ Բաղդասարյանը հարկ համարեց նշել նաեւ, որ անփոխարինելի մարդիկ չկան, ավելացնելով, որ եթե Կարեն Կարապետյանը պատրաստված անձ չլիներ, նրան վարչապետի պաշտոնը չէր վստահվի։ «Իսկ թե ով կլինի 2018 թվականից մեր վարչապետը, կուսակցության ներսում քննարկումներ չեն կազմակերպվել»,-շեշտեց պատգամավորը։

Հարցին, թե ով է լինելու գլխավոր դեմքը 2018 թվականից հետո, Բաղդասարյանը պատասխանեց․ «Իհարկե վարչապետն է լինելու թիվ մեկ խաղացողը, բայց կուսակցական առաջնորդի եւ նրա միջեւ կոնսենսուս պիտի լինի»։