Երեւանում 2016թ. մարտի 14-ի երեկոյան անչափահասի սպանության գործով նիստերն այս տարվա ընթացքում, կարելի է ասել, այդպես էլ չկայացան: Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում նիստերը նշանակվում եւ անընդհատ հետաձգվում են: Այս գործով դեկտեմբեր ամսվա ընթացքում նշանակված էր միայն մեկ նիստ, որը եւս հետաձգվեց: Նիստը նախագահող դատավոր Աննա Դանիբեկյանը հաջորդ նիստը նշանակեց 2018թ. հունվարի 17-ին:
Նշենք, որ այս գործով դատավարությունն սկսվել է 2016թ. դեկտեմբերից, սակայն, մինչ այժմ վկաների հարցաքննության փուլն է:
Նարեկ եւ Դավիթ Պետրոսյաններին մեղադրանք է առաջադրվել այն բանի համար, որ նրանք 2016թ. մարտի 13-ին` ժամը 21-ի սահմանում Երեւան քաղաքի Սարի Թաղի 5-րդ փողոցի 67 հասցեում գործող թիվ 47 դպրոցի մոտ վիճաբանության, ապա ծեծկռտուքի ժամանակ իրենց հետ նախապես վերցված «Թիթեռ» տեսակի դանակով կյանքից ապօրինի զրկելու դիտավորությամբ հարվածել են անչափահաս Ա. Բաղդասարյանի սրտին, ինչի հետեւանքով կարճ ժամանակ անց նա մահացել է: Բացի այդ դանակով դիտավորությամբ հարվածներ են հասցրել անչափահաս Սերգեյ Օսիպովին` նրա առողջությանը պատճառել միջին ծանրության վնաս` առողջության տեւական քայքայումով:
Նրանց մեղադրանք է առաջադրվել ՀՀ ՔՕ 3 հոդվածներով՝ 104-րդ հոդվածի 1-ին մասով (սպանություն), 34-104-րդ հոդվածի 2-րդ մասի 1-ին կետով (սպանության փորձ՝ երկու կամ ավելի անձանց նկատմամբ), 113-րդ հոդվածի 2-րդ մասի 1-ին կետով (2 կամ ավելի անձանց միջին ծանրության մարմնական վնաս պատճառելը):
