Հայաստանում սոցիալական վիճակի հետագա վատթարացումը կարող է դժգոհության տրամադրությունների աճ առաջ բերել: Այս մասին NEWS.am-ի թղթակցի հետ զրույցում նշել է Ազգային ժողովի «Ելք» խմբակցության պատգամավոր Գեւորգ Գորգիսյանը՝ անդրադառնալով առաջին անհրաժեշտության ապրանքների գների կտրուկ աճին:
Նրա խոսքով, անհրաժեշտ է հաշվի առնել փաստը, որ քաղաքացիների զգալի մասը 10 հազար դրամով «վաճառել է բողոքի իր իրավունքը»՝ ընտրակաշառքը վերցնելով:
«Կասկած է հարուցում այն, որ նրանք պատրաստ են հրաժարվել այսպես կոչված, գործարքից կամ պայմանավորվածությունից՝ դավաճանելով դրանով մյուս կողմին եւ դուրս գալ բողոքի գործողությունների»,-ընդգծել է Գորգիսյանը՝ վստահեցնելով, որ եթե զանգվածային դժգոհության նշաններ ի հայտ գան, ապա «Ելք» դաշինքը կլինի քաղաքացիների կողքին եւ կփորձի ամեն կերպ աջակցել նրանց:
Նշենք, որ 2018 թվականի պետական բյուջեի դեֆիցիտը կկազմի 4 տոկոս: Գնաճի ֆոնին աշխատավարձերի, թոշակների ու նպաստների ավելացում չի նախատեսվում: Բացի այդ, Հայաստանի պետական պարտքը 2017-ին հասել է 6 մլրդ 813 մլն դոլարի, իսկ արդեն 2018-ին այն կկազմի 7 մլրդ 209 մլն դոլար:
