4-5 տոկոս տնտեսական աճը, որին Հայաստանի կառավարությունը ձգտում է հասնել 2018 թվականին, չի կարող փոխհատուցել գնաճային ճնշումները: Այս մասին դեկտեմբերի 18-ին լրագրողների հետ հանդիպման ժամանակ հայտարարեց «Ծառուկյան» դաշինքի պատգամավոր, տնտեսագետ Վարդան Բոստանջյանը:
Նրա խոսքով՝ գնաճը բնական գործընթաց է բոլոր երկրների համար, այն սկզբունքորեն չի կարող չլինել, բայց վերջին շրջանում այն դարձել է կախվելու պարան բնակչության համար, քանի որ զգալիորեն գերազանցում է բնակչության եկամուտների աճին: «Միեւնույն ժամանակ, դրամական փոխանցումները, որոնք բնակչության համար եկամտի հիմնական աղբյուրն են եւ որի վրա հիմնվում են իշխանությունները, արագորեն նվազում են, քանի որ երկրից այժմ հեռանում է ընտանիքներով, եւ աշխատանքային միգրանտները Հայաստանին գումար չեն փոխանցում»,- ավելացրեց Բոստանջյանը:
Տնտեսագետի կարծիքով՝ ներկայիս դրությունից դուրս գալու համար անհրաժեշտ է խթանել հայրենական արտադրությունը, որը իր հերթին, կբերի զբաղվածության աճին։ Պետք է նաեւ հոգ տանել երիտասարդների զբաղվածության մասին, քանի որ նրանց է բաժին ընկնում գործազրկության առյուծի բաժինը։
Նշենք, որ Ազգային վիճակագրական ծառայության տվյալներով՝ Հայաստանում 2017 թ․ հունվարից-սեպտեմբեր ժամանակահատվածում 2016 թվականի նույն ժամանակահատվածի համեմատությամբ գնաճը կազմել է 0,6 տոկոս։ Տարբեր գնահատականներով, տարվա ընթացքում գնաճը չպետք է գերազանցի 2 տոկոսի ցուցանիշը։ Ֆինանսների նախարարությունը կանխատեսում է, որ 2017 թվականին տնտեսական աճը կգերազանցի պետբյուջեի ցուցանիշը 3,2 տոկոսով՝ կազմելով 4,3 տոկոս։