Վրաստանը ԵՏՄ երկրներում իր արտադրանքի արտահանման եւ վաճառքի նպատակով պետք է օգտագործի Հայաստանի հնարավորությունները եւ ազատ առեւտրի գոտիների առկայությունը: Այս մասին Թբիլիսիում վրացի գործընկեր Գեորգի Մարգվելաշվիլիի հետ համատեղ ասուլիսում ասել է ՀՀ նախագահ Սերժ Սարգսյանը:
Թբիլիսիից NEWS.am-ի հատուկ թղթակիցը հաղորդում է, որ Սարգսյանի խոսքով՝ Հայաստանում գրանցված ցանկացած ընկերություն կարող է օգտակար լինել Վրաստանի համար:
«Իրանի հետ սահմանին ազատ առեւտրի գոտին Վրաստանի համար հիանալի հնարավորություն է, քանի որ Իրանը վաճառահանման մեծ շուկա է», - ասել է նա:
Նա նաեւ ընդգծել է, որ վրացի գործընկերոջ հետ հանդիպման ժամանակ քննարկվել են տարածաշրջանի անվտանգության եև կայունության մասին հարցերը:
«Մենք համակարծիք ենք, որ երկարաժամկետ հակամարտությունները պետք է միայն համաձայնեցված ձեւաչափերում խաղաղ բանակցությունների միջոցով լուծվեն»:
Նշենք, որ Հայաստանի նախագահ Սերժ Սարգսյանը երկօրյա պաշտոնական այցով գտնվում է Վրաստանում:
Այցի շրջանակներում Հայաստանի նախագահը հանդիպումներ կունենա նաեւ վարչապետ Գեորգի Կվիրիկաշվիլիի, խորհրդարանի խոսնակ Իրակլի Կոբախիձեի, Վրաստանի պատրիարք եւ կաթողիկոս Իլյա Երկրորդի հետ:
