Վրաստանի նախագահ Գեորգի Մարգվելաշվիլին եւ առաջին տիկին Մակա Չիչուան ունեցել են եւս մեկ երեխա՝ տղա, որին ծնողները կոչել են Տոմա Մարգվելաշվիլի, հաղորդում է «Նովոստի Գրուզիա»-ն:
«Տոմա Մարգվելաշվիլին ծնվել է»,-գրել է Վրաստանի նախագահն իր պաշտոնական ֆեյսբուքյան էջում: Տոման (Ֆոմա) Վրաստանում տարածված քրիստոնեական անուն է: Տղան ծնվել է հունվարի 15-ի երեկոյան:
Նախագահական զույգն ունի եւս մեկ որդի` Թեյմուրազը, որին անվանակոչել են նախագահի պապի պատվին: Փետրվարի 2-ին նա երեք տարեկան կդառնա:
Թեմոն (ծնողները նրան այդպես են կոչում) դարձել է Գեորգի Մարգվելաշվիլիի եւ Մակա Չիչուայի առաջին ընդհանուր երեխան: Առաջին ամուսնություններից ե՛ւ նախագահը, ե՛ւ առաջին տիկինը ունեցել են աղջիկ՝ Աննան եւ Մաշոն, որոնք արդեն չափահաս են, ավելին՝ երկուսն էլ ամուսնացած են:
2016 թ. հուլիսի 11-ին Վրաստանի նախագահը պապիկ էր դարձել՝ դուստրը` Աննան աղջիկ էր ունեցել։
Մարգվելաշվիլին պետության ղեկավար դառնալուց հետո ամուսնացել էր նկարչուհի եւ դերասանուհի Մակա Չիչուայի հետ: Նրանք իրենց հարաբերություններն օրինականացրել են 2015 թ. սեպտեմբերի 10-ին: