Ինչ նշանակություն ունի ընդդիմադիր, թե դիմադիր լինելը, եթե իշխանության թեկնածուն ընդունելի է: Այս մասին NEWS.am-ի հետ զրույցում ասել է ՀՀԿ խմբակցության պատգամավոր Գագիկ Մելիքյանը՝ անդրադառնալով՝ Ծառուկյանի հայտարարությանը:
Նշենք, որ Գագիկ Ծառուկյանը լրագրողների հետ զրույցում չէր բացառել, որ կսատարեն իշխանության նախագահի թեկնածուին:
«Ի՞նչ նշանակություն ունի՝ ընդդիմադի՞ր է, թե՞ դիմադիր, եթե թեկնածուն ընդունելի է բոլորի համար, կարող են սատարել»,-ասել է Գագիկ Մելիքյանը:
Դիտարկմանը, որ «Ծառուկյան» խմբակցությունը ՀՀԿ-ի վարչապետի գլխավորած կառավարությանը խիստ քննադատում է, այդ կառավարությունը ՀՀԿ-ի քաղաքականությունն է վարում, ինչու նախագահի թեկնածուի վերաբերյալ այլ մոտեցում ունեն, ինչ-որ բանից կաշկանդվա՞ծ են, իշխանության ներկայացուցիչն ասաց. «Ոչ մեկ ոչ մեկից չի կաշկանդվում, առաջարկությունը ընդունելի է, կարող է առաջարկությունը պաշտպանության արժանանա ընդդիմադիր ուժի կողմից»:
Նշենք, որ նախագահականում հրավիրված խորհրդակցության ժամանակ Սերժ Սարգսյանը ցանկություն էր հայտնել, որ նախագահը ընտրվի ընդարձակ քվերակությամբ:
Մելիքյանին հարցրինք՝ ինչպես կբնութագրի խորհրդարանական երկրորդ ուժը համարվող ընդդիմադիր խմբակցության եւ իշխանության այս հարաբերությունը նախագահի թեկնածուի հարցում միասնականության մասով, պատասխանեց.«Սա կոչվում է քաղաքական միասնություն»: