ՀՀ զինված ուժերի գլխավոր շտաբի պետ, գեներալ-գնդապետ Մովսես Հակոբյանի գլխավորած պատվիրակությունը հունվարի 16-ին Բրյուսելում՝ ՆԱՏՕ-ի կենտրոնակայանում, մասնակցել է զինված ուժերի գլխավոր շտաբերի պետերի մակարդակով Հյուսիսատլանտյան դաշինքի ռազմական կոմիտեի խորհրդաժողովին:Այս մասին այսօր՝ հունվարի 16-ին, NEWS.am-ը տեղեկանում է ՀՀ ՊՆ մամուլի ծառայությունից:
Խորհրդաժողովի շրջանակում անցկացվել է երկու նիստ` «Փոխգործունակության հարթակ» նախաձեռնությանը ներգրավված, ինչպես նաեւ Աֆղանստանում «Վճռական աջակցություն» առաքելությանը մասնակցող պետությունների ձեւաչափերով:
«Փոխգործունակության հարթակ» ձեւաչափով նիստի ժամանակ քննարկվել են Եվրոպայի հարավային հարեւանության տարածաշրջաններից բխող անվտանգության եւ կայունության մարտահրավերներին եւ դրանց դիմագրավման ջանքերի համադրմանն առնվող հարցեր:
«Վճռական աջակցություն» ձեւաչափով անցկացված նիստը միտված էր Աֆղանստանում կոալիցիոն գործողության ընթացիկ խնդիրների ներկայացմանը, խնդրահարույց հարցերի քննարկմանը եւ ընդհանուր դիրքորոշումների ձեւավորմանը:
