Հայաստանում գնաճի սկիզբը դրվել է 2013 թվականի սեպտեմբերի 3-ին, երբ հայտարարվեց Եվրասիական միություն մտնելու մտադրության մասին: Այս մասին հունվարի 17-ին լրագրողների հետ հանդիպման ժամանակ ասաց Գերագույն խորհրդի նախկին պատգամավոր Ազատ Արշակյանը: Նրա խոսքով՝ հիմա Հայաստանը Եվրասիական տնտեսական միությանը պարտավորություններով է կապված:
Խոսելով հունվարի 19-ին «Ելք»-ի կազմակերպած գնաճի դեմ բողոքի երթի մասին՝ Արշակյանը նշեց, որ չնայած պայքարն ուշացած է, սակայն նախատեսված ակցիան ինքնին դրական երեւույթ է: Նրա խոսքով՝ Երեւանում բողոքի երթ անցկացնելու «Ելք» դաշինքի առաջարկն ուշադրության արժանի է, սակայն սա առկա խնդրի լուծում չէ, քանի որ անհրաժեշտ է պայքարել ոչ թե գնաճի հետեւանքների, այլ պատճառների դեմ: «Մինչդեռ, «Ելք» դաշինքը դա չի անում՝ համակերպվելով 2017-ի ապրիլի ընտրություններից հետո գործող իշխանությանը լուրջ մրցակցություն լինելու անընդունակության հետ»,- եզրափակեց Ազատ Արշակյանը: